Дэлгэцийн од Г.Золбоот гавьяат боллоо : Тал нутгийн цахим мэдээлэлийн сайт

Дэлгэцийн од Г.Золбоот гавьяат боллоо

Монгол Улсын Соёлын тэргүүний ажилтан Г.Золбоот шүтэн бишрэгчиддээ нэгэн сайхан мэдээг дуулгалаа. Учир нь тэрбээр энэ сарын 24-нд Монгол Улсын Гавьяат жүжигчин цол тэмдгээр энгэрээ мялаалгах гэнэ.

Тэрбээр 1989 онд УБДС-ийн кино драмын ангийг дүүргэж жүжигчин болох гараагаа эхэлсэн бөгөөд 28 жил урлагийн салбарт зүтгэж яваа билээ. Түүний дэлгэцийн урлагт бүтээсэн анхны дүр нь “Бүлээн нурам” кино байсан бөгөөд 20 жилийн хугацаанд дэлгэцийн урлагт 40 гаруй дүр бүтээсэн байна.

Тодруулбал, “Долоон бурхан харвадаггүй”, “Аравт”, “Үхэж үл болно Чингис хаан”, “Мойлхон”, “Сүүлчийн бүжиг”, “Цахирмаа” зэрэг кинонд гол болон туслах ард түмнийхээ сэтгэлд хоногшсон дүр бүтээжээ. Харин жүжиг, хошин урлагийн шоу хөтөлбөрт 130 гаруй дүрийг бүтээсэн аж.

Дэлгэцийн олон сайхан дүрээрээ монгол түмний хайр хүндэтгэлийг хүлээсэн жүжигчин Г.Золбоот “Үнэхээр сайхан санагдаж байна. Энэ ганцхан миний баяр, миний шагнал биш. Олон хүн намайг МУГЖ цол хүртээсэй, цаг нь болсон байтал энэ хүн яагаад авахгүй байна вэ гэж миний өмнөөс дуугарч байсанд би үнэхээр их талархдаг. Олон хүний ерөөл буян, сайхан үгс биелэлээ олж байгаад баяртай байна. Түмэн олондоо баярлалаа. Хүнд хайрлагдаж, хүндлэгдэх хувь тохиол байж дээ л гэж баярлаж сууна” хэмээн баярын сэтгэгдлээ хуваалцсан юм.

Дашрамд сонирхуулахад, СТА Г.Золбоот энэ сарын 24-нд 11:00 цагт Төрийн ордноос МУГЖ-ний цол тэмдгээ гардан авах юм байна.

МЭДЭЭНИЙ СЭТГЭГДЭЛ

ХОЛБООТОЙ МЭДЭЭ

Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.