Монгол Улсын Их Хурлаар Цагдаагийн албаны тухай хуулийн шинэчилсэн найруулга өнгөрсөн сарын 9-нд батлагдсан билээ. Энэхүү хуулийн 73 дугаар зүйлийн 73.1.4-т цагдаагийн бага цолд "цагдаагийн тэргүүн ахлагч", "сургагч ахлагч"-ийн цолыг шинээр нэмж тусгасан юм.

Тиймээс Цагдаагийн албаны тухай хуулийн хэрэгжилтийг хангах бэтгэл ажлын хүрээнд "Сургагч ахлагч" нарын мэдлэг, ур чадварыг дээшлүүлэхэд зайлшгүй шаардлагатай эерэг хандлагыг төлөвшүүлэх, тэдний бүтээлч сэтгэлгээг хөгжүүлэх, харилцах, ярих илтгэх чадварыг дээшлүүлэх, удирдан зохион байгуулах, манлайлах чадвар эзэмшүүлэх зорилгоор таван хоногийн модуль вакумжуулсан сургалтыг зохион байгуулжээ.

"Сургагч ахлагч" нь тухайн нутаг дэвсгэр, нэгж байгууллагын даргын зөвлөлийн гишүүний үүргийг гүйцэтгэж, байгууллагын удирдлагад ахлагч бүрэлдэхүүний сургалт, хөгжлийн үйл ажиллагаа, нийгмийн асуудал, тогтвор сууршилтай ажиллах, тулгарч байгаа хүндрэл бэрхшээлийг шийдвэрлэхэд дэмжлэг үзүүлж, зөвлөх, тэдний дуу хоолой болж ажиллах үүрэгтэй ажээ. Сургалтын үеэр  Хууль сахиулахын их сургуулийн Хүндэт доктор, хошууч генерал Ч.Амарболд, Зэвсэгт Хүчний Жанжин Штабын тэргүүн ахлагч Д.Оюунболд, Н.Энхбаяр нар "Ахлагч бүрэлдэхүүний цагдаагийн албанд эзлэх байр суурь", "Монгол Улсын Зэвсэгт хүчний Ахлагчийн алба" зэрэг сэдвээр лекц уншсан байна.

Алба хаагчдын мэдлэгийг дээшлүүлэхээс гадна тэдний бие бялдрыг хөгжүүлэх, бие хамгаалах, албаны бэлэн байдал, галт зэвсэг, тусгай хэрэгсэл хэрэглэх, хүндрүүлсэн нөхцөл байдалд үүрэг гүйцэтгэх сэтгэл зүйн бэлтгэл зэрэг дадлага сургалтуудыг шөнийн цагаар тусгай хөтөлбөрийн дагуу зохион байгуулж явуулснаараа чухал ач холбогдолтой гэдгийг холбогдох байгууллагынхан онцолсон.

Сургалтад суусан алба хаагчид гэрчилгээ гардуулсан байна. Энэхүү ёслолын үйл ажиллагаанд Цагдаагийн ерөнхий газрын дэд дарга, дэд комиссар Ч.Болдбаатар, Хяналт шалгалт, үнэлгээ, дотоод аудитын хэлтсийн дарга, цагдаагийн хурандаа Н.Батзогсох, Сургалын төвийн дарга, цагдаагийн хурандаа Б.Цогтбаяр нар болон суралцагчдын ар гэрийнхэн оролцжээ.