Нийслэлийн Засаг даргын Тамгын газраас “Нээлттэй нийслэл” мэдээллийн цагт нийслэлийн есөн дүүргийн Засаг дарга нарыг оролцуулж, 100 хоногт хийж хэрэгжүүлсэн ажлынх нь тайланг сонсч байгаа билээ. Энэ удаагийн “Нээлттэй нийслэл” мэдээллийн цагт Баянгол дүүргийн Засаг дарга С.Одонтуяа оролцсон юм.  Тэрбээр Баянгол дүүргийн Засаг даргын үүрэг гүйцэтгэж эхэлснээс хойш Баянгол дүүргийн Засаг даргын Тамгын газар 100 хоногийн дотор маш олон ажлыг амжуулжээ.

 

Түүнчлэн Баянгол дүүргийн Засаг дарга С.Одонтуяа дүүргээ сайн мэдэх иргэний хувьд 2016-2020 оны мөрийн хөтөлбөртөө “Эрүүл дүүрэг” болох эрхэм зорилгыг дэвшүүлэн, иргэний эрүүл мэнд, боловсрол, гэр бүл рүү чиглэсэн хөрөнгө оруулалтуудыг хийж, хичээн ажиллахаа мэдэгдэж байсан билээ. Ингээд “Нээлттэй нийслэл” мэдээллийн үеэр Засаг дарга С.Одонтуяатай хийж, хэрэгжүүлсэн ажлынх нь талаар цөөн хором ярилцлаа.

 

-Таны хувьд Засаг даргын ажлаа хүлээж аваад 100 хонож байна. Энэ хугацаанд ямар ажлыг хийж, хэрэгжүүлж байна вэ?

 

-Засаг даргын үүрэгт ажлаа хүлээж авснаас хойш бид төрийн ажлын залгамж халааг үргэлжлүүлэх, төрийн ажлын үйлчилгээг иргэдэд саадгүй, хүртээмжтэй хүргэх зорилго баримтлан ажиллалаа. Мөн өөрийн мөрийн хөтөлбөрт тусгагдсан ажлууд болон 2017 онд хийх ажлынхаа үндсэн чиглэлийг хэрэгжүүлэн ажиллаж байна. Бид юун түрүүнд “Эрүүл дүүрэг” болох том зорилгыг дэвшүүлэн, энэ хүрээнд хэд хэдэн ажлыг хийлээ. Тухайлбал, ахмад настанд зориулсан нөхөн сэргээх  болон хүүхдийн 100 ортой эмнэлгийн барилгыг амжилттай дуусгаад,  нээлтээ хийхэд бэлэн болсон.

 

Мөн Баянгол дүүргийнхээ эмнэлэгт мэс заслын тасаг байгуулахаар болсон. Түүнчлэн сүүлийн 25 жил огт хийгдээгүй ажил буюу хараагүй иргэдэд зориулсан 90 айлын орон сууцны барилгын ажлыг дуусгалаа. Түүнээс гадна Гэр бүл ёслолын ордонг барьж дуусгасан. Ингэснээр манай дүүргийн иргэд төрөлх дүүрэгтээ гэр бүлээ батлуулан хурим хийх, иргэний андгай өргөх, шинэ төрсөн хүүхдүүд гэрчилгээгээ гардан авах боломж бүрдэж байгаа юм. 

 

-Мэс заслын тасаг нээхэд бэлэн болсон гэсэн. Энэ талаар дэлгэрэнгүй мэдээлэл өгөхгүй юу. Дүүргийн төсвөөр баригдсан уу?

 

-Баянгол дүүрэгт 2016-2020 онд 372 тэрбум төгрөгийн хөрөнгө оруулалт хуваарилагдсан байдаг. Есөн давхар эмнэлэг болон мэс заслын тасаг дүүргийн төсвийн хөрөнгөөр баригдсан. Өнгөрсөн дөрвөн жилийн хугацаанд манай дүүрэгт есөн өрхийн эмнэлэг, дөрвөн том эмнэлэг баригдсан.  Өөрөөр хэлбэл, дөрвөн жилийн дотор нийт 13 эмнэлэг  Баянгол дүүрэгт баригдсан.

 

-Сүүлийн үед хүүхдийн эрхийн асуудал их яригдаж байна. Хүүхдийн эрхийг хамгаалах, тэдний сурч боловсрох орчинг бүрдүүлэх тал дээр ямар ажил хийж байна вэ?

 

-Тийм. Мэдээж хүүхдийн сурч боловсрох эрхийг хангах асуудал хурцаар тавигдаж байна. Жил бүр есдүгээр сард хүүхдийн сургууль цэцэрлэг хүрэлцэхгүй байх зэрэг асуудал гардаг. Тиймээс бид сургууль, цэцэрлэгийн хүрэлцээг нэмэгдүүлэх, шинэ барилга барих ажлыг хийж байна л даа. Өнгөрсөн 100 хоногийн хугацаанд гэхэд сургуулийн өмнөх насны хүүхдүүдийн сургуульд хамрагдах идэвх оролцоог нэмэгдүүлэхийн тулд дүүргийн 77, 95, 242 дугаар цэцэрлэгт өргөтгөл, шинэ барилгын ажлыг эхлүүлэн, дуусгахад анхааран ажиллалаа. Ингэснээр манай дүүргийн цэцэрлэгийн орны тоо 500-гаар нэмэгдсэн.

 

Бид зөвхөн хүүхдүүдийн сурах орчинг бүрдүүлж, сургууль, цэцэрлэгийн барилгын тоог нэмэхээс гадна тэдэнд чанартай боловсрол эзэмшүүлэх, цаашид хөгжиж, дэвшихэд анхаарах ёстой. Тиймээс Баянгол дүүрэг хүүхэд, залуучууд руу чиглэсэн ажлыг амжилттай эхлүүлж тодорхой үр дүнд хүрч байна. Манай Хүүхэд хөгжлийн төв дээр гэхэд нээлттэй номын сан, дугуйлангууд хичээллэж байна. Үүнээс гадна гэр бүл доторх архидалт хүүхдийн хүмүүжилд их нөлөөлж байгаа. Аав, ээж нь архи уудгаас болж хүүхдүүд боловсрол эзэмшиж чадахгүй, хүчирхийлэлд өртөж, гудамжинд амьдрах зэрэг шалтгаан үүсдэг. Тиймээс бид нийгмийг доройтуулж байгаа гол цөмтэй нь тэмцэх хэрэгтэй. Энэ хүрээнд “Архигүй Баянгол” хөтөлбөрийг хэрэгжүүлж байна. Энэхүү хөтөлбөрийн хүрээнд дүүргийн хэмжээнд архинаас хамааралтай иргэдийн тоог бууруулах, архи согтууруулах ундааны хэрэглээг бууруулах тал дээр анхааран ажиллаж байна. 

 

Мөн хүүхэд залуучуудыг тэсвэр, хатуужилтай, эх оронч үзэлтэй болгох “Эх орон 36” хөтөлбөрийг хэрэгжүүлж эхэлсэн. Уг хөтөлбөрийн үр дүнд хүүхэд, залуус маань эх орноо хайрлан хамгаалах хүмүүжлийг авч байна. Ер нь хүүхэд, залуучууд руу чиглэсэн олон ажил бий л дээ. Техник технологийн дээд сургуультай хамтран ЕБС-ийн сурагчдыг инженер сэтгэлгээтэй болгох, мэргэжлээ зөв сонгоход туслах зорилгоор “Ирээдүйн инженерүүд” хөтөлбөрийг санаачлан сурагчдыг Япон улсын Коосэн сургалттай танилцууллаа. Энэ хүрээнд япон багш нараар хичээл заалгаж байна. Энэ мэтчилэн олон ажлыг хийж эхэлсэн. 

 

-Төрийн үйлчилгээг иргэдэд ойр байлгах тал дээр нэлээд анхаарч ажилласан гэлээ. Хөгжлийн бэрхшээлтэй, өндөр настай хүмүүс төрийн үйлчилгээг авахад хүндрэлтэй байдаг шүү дээ. Эдгээр хүмүүст төрийн үйлчилгээг тэгш хүргэхэд анхаарч ажиллаж байгаа юу?

 

-Бид хөгжлийн бэрхшээлтэй иргэдэд ээлтэй жишиг дүүрэг болох зорилт тавьсан. Энэ хүрээнд хөгжлийн бэрхшээлтэй иргэдийг дэмжих үүднээс фэйсбүүк пэйж хуудас нээн ажиллуулж байна. Энэ хуудсаараа дамжуулан тэдний санал хүсэлтийг сонсох, хууль эрхзүйн болон цаг үеийн мэдээллийг түргэн, шуурхай хүргэхийг зорин ажиллаж байна. Мөн нөгөөтэйгүүр төрийн үйлчилгээг ойртуулж өгч байгаа юм. Өөрөөр хэлбэл, хөгжлийн бэрхшээлтэй иргэд маань энэхүү пэйж хуудсаар дамжуулан дүүргийнхээ Засаг даргын Тамгын газраас хийж хэрэгжүүлж байгаа ажилтай танилцах, холбогдохоос гадна бусад байгууллагуудтай харилцах боломжтой. Товчхон дүгнэж хэлэхэд, өнгөрсөн дөрвөн жил бүтээн байгуулалтын жил байсан. Ирэх дөрвөн жилд бид иргэд рүүгээ, хүн рүүгээ чиглэсэн ажлыг онцгойлон хийж хэрэгжүүлнэ.

 

-Нийслэлийн хэмжээнд агаарын бохирдол ихэссэн. Үүнтэй холбогдуулан эцэг, эхчүүд хүртэл жагсаал хийсэн шүү дээ. Танай дүүргийн хувьд өнгөрсөн хугацаанд агаарын бохирдлыг бууруулахад хэрхэн анхаарч ажиллав?

 

-Агаарын бохирдлыг бууруулах тал дээр нэлээд тодорхой ажлуудыг хийсэн. Манай дүүргийн XI хорооны цогцолбор байрууд нүүрсэн галлагаатай байсныг уурын бойлуураар сольсон. Одоогоор туршилтын ажил явагдаж байгаа. Мөн цахилгааны хэрэглээний зардлыг 50 хувиар буурууллаа. Үүнээс гадна “Утааны эсрэг усан спорт” хөтөлбөрийг хэрэгжүүлсэн.

 

Энэхүү хөтөлбөрийнхөө хүрээнд халаалтын асуудлаа цахилгаанаар шийдсэн гэр хорооллын өрхүүдээ урамшуулах зорилгоор дүүргийнхээ усан спорт сургалтын төвд хүүхдүүдийг нь үнэ төлбөргүй сургаж байгаа. Түүнчлэн агаарын бохирдлыг бууруулах зориулалттай шинээр гарсан бүтээгдэхүүнийг дүүргийнхээ иргэдэд таниулах зорилгоор үзэсгэлэнгийн танхимыг нээлээ. Ингэснээр иргэд бүх мэдээллийг нэг дороос авах, хөнгөлөлттэй үнээр бараа бүтээгдэхүүн худалдаж авах зэрэг боломжууд нээгдсэн.

 

-Хуучин барилгыг нураах нэрийдлээр нийтийн эзэмшлийн талбай дээр шинээр барилга барьж байна. Энэ тал дээр ямар арга хэмжээ авах вэ?

 

-Баянгол дүүргийн тулгамдсан асуудлын нэг бол яах аргагүй хуучин орон сууцны барилгын дулаалгын асуудал юм. Бид энэ асуудлыг шийдэхийн тулд Техник технологийн их сургуультай хамтран ажиллаж байна. Техник технологийн их сургууль дулаалгын бүх материалыг туршиж үзэн, хамгийн хэмнэлттэй, дулаанаа удаан хадгалдаг материалыг бидэнд санал болгох юм. Өөрөөр хэлбэл, Техник технологийн их сургуульд Япон улсад үйлдвэрлэсэн бүх төрлийн дулаан хэмждэг багаж, тоног төхөөрөмжийн тусламжтайгаар судалгааны ажлыг явуулж байна. 

 

Энэхүү судалгааны ажил дуусахаар орон сууцны дулааны асуудал шийдэгдэнэ. Хэд хэдэн барилгыг жишгээр дулаалсан. Дахин төлөвлөлтийн хувьд ерөнхий төлөвлөгөөнд тусгагдсан. Гэхдээ барилгын компаниудын тавьж буй санал газар нь дахин төлөвлөлтөд орсон иргэдийн санаанд нийцэхгүй байгаа учраас энэ асуудал төдийлөн урагшлахгүй байна. Тиймээс бид нийслэлийн Засаг даргын Тамгын газартай дахин төлөвлөлтийн асуудлыг ярилцаж байгаа.