Улаанбаатар хотноо энэ сарын 13-14-ний өдрүүдэд АСЕМ-ийн дээд хэмжээний XI чуулга уулзалт болно. Тэгвэл АСЕМ-ийн дагалдах хурлуудын нэг Ази, Европ түмний XI чуулган өчигдөр Төрийн ордны их танхимд эхэллээ. Уг чуулган энэ сарын 4-6-ны өдрүүдэд болох юм. “Шударга, тэгш хүртээмжтэй хөгжлийн арга замыг Ази, Европт хэрэгжүүлэн, эв санааны шинэ нэгдлийг байгуулах нь” сэдвийн хүрээнд өрнөж байгаа энэхүү чуулганд АСЕМ-ын 51 орон, хоёр олон улсын байгууллагын 500 гаруй төлөөлөгч оролцож байгаа юм. Чуулганы нээлтэд Монгол Улсын Ерөнхийлөгч Ц.Элбэгдорж оролцож үг хэлсэн юм. Тэрбээр “Монгол Улсын хувьд ард түмний чуулга уулзалт маш чухал юм. Манай улсын хувьд иргэдийн оролцоо нийгмийн хөгжилд асар өндөр чухал үүрэгтэй байдаг. Иргэдийн оролцоог олон нийтийн байгууллага, төрийн бус байгууллага гэж манайд нэрлэдэг. Энэ төрийн бус байгууллагаар дамжиж Монгол Улсад иргэдийн оролцоо хэрэгждэг.

 

Аливаа улсад нийгмийн байгууллыг бие гэж үзэх юм бол түүний зүрх сэтгэл нь ард түмэн юм. Түүний зүрх сэтгэл нь олон нийтийн байгууллага юм. Төрийн бус байгууллага юм. Монгол Улсад олон нийтийн байгууллага, иргэдийн оролцоог ингэж хүлээж авдгийг хэлье. Аливаа улс орны хөгжлийг хүн нь, ард түмэн нь хөтөлдөг. Тэр хөтлөгч нь институтын хувьд олон нийтийн байгууллага, төрийн бус байгууллагууд гэж харж байгаа.

 

Ер нь Монголын хөгжлийн философи нь иргэддээ тулгуурладаг юм гэж би хардаг. Манай улсын иргэд эрхтэй байх ёстой. Манай улсын иргэд нийгмийн амьдралд, улс төрийн амьдралд, бүхий л амьдралд идэвхтэй оролцох ёстой. Манай улсын иргэд илүү боломжтой байх ёстой. Энэ нөхцөл байдлыг хангахын төлөө төр нь ажилладаг. Иргэддээ үйлчилдэг. Ийм л байгууллага гэж бид үздэг. Тэгэхээр Монгол Улсын хөгжлийн философи бол илүү эрхтэй, илүү оролцоотой, илүү боломжтой ард иргэд гэж үзэж болно. Ингэж байж л Монгол Улс цэцэглэн хөгжинө, урагшилна гэж бид үздэг.

 

Монгол Улсын хөгжлийн хамгийн гол хөдөлгөгч хүч нь манай ард иргэд юм. Тэдний өмнө явдаг хүмүүс нь зохион байгуулалтад орсон нийгмийн идэвхтэй иргэд юм. Энэ иргэдийн хүч, хөдөлмөрийг бид асар их үнэлэхийг эрмэлздэг” гэдгийг онцоллоо. Мөн саяхан болсон Монгол Улсын Ерөнхийлөгч, ОХУ-ын Ерөнхийлөгч, БНХАУ-ын дарга нарын дээд төвшний уулзалтын талаар дурьдлаа. Энэ талаар “Монголын газар нутгаар дамжин өнгөрөх тээврийн асуудал, төмөр замын асуудал, түүнтэй холбоотой татвар, шалгалт зэрэгтэй холбоотой асуудлыг бид ярилцсан.

 

Маш чухал баримт бичгүүдэд гарын үсэг зурлаа. Монголчууд нэг зүйлээр бахархдаг. Бид Ази-Европ тивийн уулзвар дээр оршдог. Энэ уулзвар дээр оршдог орны хувьд холбоос, залгаас, энэ дунд байгаа алтан гинж нь болж оролцохыг бид нар хүсдэг. Тэгэхээр энэ явж байгаа дэд бүтэц, уялдаа холбоо Монголоор дамжиж өнгөрч байгаасай. Ази, Европ руу чиглэсэн зам Монголыг дамжиж өнгөрч байгаасай. Ази, Европын ард түмний уулзалтын гол цэг нь Улаанбаатар байгаасай. Монгол Улс байгаасай. Ази, Европын ард түмнийг холбодог зам нь  Улаанбаатарыг чиглэдэг байгаасай гэж хүсч байгаа” гэлээ. Энэ жил Монголд бороотой, их сайхан дулаан зун болж байгааг дуулгаад хурлын зочдыг зөвхөн Улаанбаатарт байх биш, болж өгвөл  Улаанбаатараас гарахыг санууллаа. Мөн Монголд гурав хоноод явах биш, дараа нь долоо хоногоор ирэх хэрэгтэй. Олон нийтийн байгууллага, найз нөхдөө дагуулж ирээрэй хэмээн урив.