Монголын хошин урлагийн “Комеди” театрын захирал, жүжигчин Б.Даваажав “Шударга журам” медалиар энгэрээ мялаажээ. Тэрбээр өнгөрсөн гуравдугаар сарын 03-04-нд шилжих шөнө болсон байгалийн гамшигт үзэгдэл цасан шуурганы үеэр 13 иргэний амь насыг авран хамгаалсан байна.

Тухайн үед тэрбээр өөрийн жолооч болох Е.Хишиг-Эрдэнийн хамт Архангай аймгийн Хангай суманд тоглолт хийж явах үеэрээ цасан шуурганд автомашин нь эвдэрч, хээр саатсан эдгээр хүмүүсийг аврахын тулд өөрсдийн амь насыг үл хайхран зүтгэсэн аж.

Жүжигчин залуугийн аварсан эдгээр хүмүүсийн дунд гурван жирэмсэн эмэгтэй, хоёр хүүхэд явж байжээ. Ийнхүү баатарлаг эр зориг гарган олон хүмүүсийн амь насыг аварсан тэднийг ОБЕГ-ын Захиргааны удирдлагын газрын дарга, хурандаа Л.Болдбаатар “Онцгой байдлын албаны төлөө-3” тэмдгээр шагнаж байсан.

Харин Ерөнхийлөгч Ц.Элбэгдорж жүжигчин Б.Даваажавыг “Шударга журам” медалиар шагнасан байна.