Коронавируст халдвар Монгол Улсын бүх аймаг, сумдад тархаж улсаараа улаан бүс болоод байгаа ч ЭМЯ-наас ганцхан Өмнөговь аймагт илэрч байгаа тохиолдлын тоог зарлахгүй, “ногоон бүс” хэмээн зарлаад удаж байна.

 

Тэгвэл өчигдөр Өмнөговь аймгийн Эрүүл мэндийн газраас тус аймагт коронавирусийн 14 тохиолдол бүртгэгдэж, халдвар өргөн хүрээнд тархаж байгааг өөрсдөө зарлалаа. 

Өмнөговь аймаг бол Монголын эдийн засгийн гол бүс нутаг. Тус бүс нутагт экспортын гол түүхий эд болох зэс, нүүрсний томоохон уурхай ажиллаж, олборлолт явуулдаг. Иймд, төр засгаас Өмнөговь аймгийг ногоон бүс болгон зарлаж, халдвар хамгааллын дэглэмийг чанд сахиж ирсэн ч халдвар бүртгэгдэж, зарим уурхай, хилийн боомтод тэг зогсолт хийх нөхцөл үүсээд байгаа аж. 

 

Тухайлбал, өнөөдөр Өмнөговь аймагт 12 тохиолдол бүртгэгдсэнээс 11 нь Ханбогд сумын Цагаан хад боомтод байгаа нүүрс тээврийн жолооч, бусад иргэдээс илэрсэн байна. Иймд, Цагаан хад боомтод маргаашаас буюу зургадугаар сарын 24-ний 06.00 цагаас долдугаар сарын 6-ны 06.00 цаг хүртэл тэг зогсолт хийж, халдварын тархалтыг хумих арга хэмжээг авахаар Ханбогд сумын УОК-оос шийдвэрлэсэн байна. Өөрөөр хэлбэл, энэ хугацаанд Эрдэнэс-Тавантолгой, Тавантолгой, Энержи ресурс, Оюу толгойн зэрэг томоохон уул уурхайн компаниуд Цагаан хад боомтоор дамжин Хятад руу экспорт хийж чадахгүй байдалд орж байгаа аж.  

 

Тус аймгийн нутаг дэвсгэр дээр үйл ажиллагаа явуулдаг хоёр том компанитай холбогдож  халдварын нөхцөл байдал болон үйл ажиллагаа хэвийн явагдаж байгаа талаар тодрууллаа.

Зургадугаар сарын 22-ны байдлаар Өмнөговь аймгийн Бүсийн оношилгоо эмчилгээний төвд коронавирусийн халдвартай нийт 63 иргэн хэвтэн эмчлүүлж байгаагийн гурав нь эрчимт эмчилгээнд, нэг хүн маш хүнд байгаа аж.