Монгол Улсын бүх иргэнийг халдварт болон халдварт бус өвчнөөс урьдчилан сэргийлэх эрт илрүүлэх үзлэг, шинжилгээ, оношилгоонд хамруулах ажил өнөөдрөөс эхэлж байна. Уг ажлыг нээж Эрүүл мэндийн сайд С.Энхболд үг хэлсэн юм.

Тэрээр “Урьдчилан сэргийлэх үзлэг нь хэд хэдэн онцлогтой. Бид хоёр жилийн хугацаанд цар тахалтай тэмцэж, ард иргэдийн багагүй хувь нь халдвар авсан. Тиймээс халдварын дараа иргэдийн биед үлдэц, өөрчлөлт байгаа эсэхийг илрүүлэх нь нэн тэргүүний зорилт юм. Хоёрдугаарт, иргэн бүр урьдчилан сэргийлэх үзлэгт тогтмол хамрагддаг болгож хэвшүүлэх, гуравдугаарт, Монгол Улсын хүн ам дунд зонхилон тохиож буй таван өвчнийг бууруулах зорилготой. Урьдчилан сэргийлэх үзлэг өнөөдрөөс эхлэн нэг жилийн хугацаанд зохион байгуулагдана. Үзлэг суурин болон явуулын амбулаториор зохион байгуулагдана. Ингэхдээ аймгийн төвөөс алслагдсан сумдын иргэдэд явуулын амбулаториор үзлэг хийх юм. Энэ мэт маш олон ажлууд хийгдэж байгаа. Иймд иргэд маань хувь хүний үүргээ биелүүлж, урьдчилан сэргийлэх үзлэгт хамрагдахыг уриалж байна. Бид урьдчилан сэргийлэх багцыг зургаан насны ангиллаар хийж байгаа. Өмнө нь манай улс 2018 оноос урьдчилан сэргийлэх үзлэгийг зохион байгуулсан. Гэсэн хэдий ч хамрагдалтын байдал маш бага үзүүлэлттэй буюу 8.8 хувьтай байсан юм. Тиймээс энэ жилээс эхлэн насны багцыг нэмж, оношилгооны нэр төрлийг 11-ээс 19 болгож нэмэгдүүлсэн. Тодруулбал, насанд хүрэгчдэд насны багцаас хамаарч 12-18 нэр төрлийн шинжилгээ хийх бол 0-17 насны хүүхдүүдийг 4-6 нэр төрлийн оношилгоо шинжилгээнд хамруулна. Энэ арга хэмжээ нь иргэдийг өвдөхөөс нь өмнө өвчнийг эрт илрүүлж, монгол хүнийхээ эрүүл мэндэд анхаарч буй нэгэн том алхам гэж ойлгож болно. Урьдчилан сэргийлэх эрт илрүүлэх үзлэг шинжилгээ өнөөдөр албан ёсоор эхэлснийг мэдэгдье" гэлээ.