Орхон аймгийн 50 иргэн өнөөдөр өргөө цагаан гэртэй боллоо. Аймаг, сумдын Засаг дарга нарт хандаж гэр хүссэн 150 орчим иргэний өргөдөлд нөхцөл байдлын үнэлгээ хийсний үндсэн дээр амьжиргааны баталгаажих төвшнөөс доогуур орлоготой, гал, усны гамшигт өртөж орон гэргүй болсон, өндөр настай гээд Баян-Өндөр, Жаргалант сумдын 25 багийн 73 иргэнд гэр олгохоос өнөөдөр 50 иргэнд гэр олгов.

Тодруулбал, аймгийн Нийгмийн халамжийн зөвлөл, Баян-Өндөр, Жаргалан сумдын Амьжиргааг дэмжих зөвлөл, баг, сумын ажлын албаны хамтарсан өргөтгөсөн хурлаар гэр олгох асуудлыг хэлэлцэн шийдвэрлэжээ. Гэр олгох үйл ажиллагаанд Засаг дарга С.Батжаргал, Засаг даргын нийгмийн асуудал хариуцсан орлогч А.Түвшинжаргал, Баян-Өндөр сумын Засаг дарга Б.Баасансүрэн, Жаргалант сумын Засаг дарга Б.Зоригтбаяр болон иргэд оролцлоо. Засаг дарга С.Батжаргал “Гэр очих ёстой эзэддээ очиж байгаа гэдэгт эргэлзэхгүй байна.

Өнөөдөр өргөө цагаан гэрийн эзэд болж байгаа иргэддээ эрүүл энхийг хүсье, цааш нь арчилж тордоод аваад явна гэдэгт итгэлтэй байна6. Өргөө гэртэй аз жаргалтай амьдрах болтугай” гэлээ. Засаг даргын нийгмийн асуудал хариуцсан орлогч А.Түвшинжаргал “Хүний анхдагч хэрэгцээ болсон орон гэртэй болно гэдэг баяртай үйл явдал. Аймгийн Засаг дарга, ИТХ тусламж дэмжлэг шаардлагатай иргэдээ орон гэртээ болгоход онцгойлон анхаарч ажиллаж байна. Орхон аймагт олон жил амьдарсан, байгалийн гамшигт нэрвэгдсэн, хагас болон бүтэн өнчин гээд амьдралын хүнд хэцүүд нухлуулж тэмцэж тэсэж амьдарч байгаа иргэдээ орон гэртэй болгоход анхаарч жил бүр 45-50 гэр олгож байна.

Харин үүнд өөриймсөг хандаж арчилж тордоод аваад явах нь иргэн Та бүхний ухамсартай холбоотой” гэв. Аймгийн Засаг даргын үйл ажиллагааны хөтөлбөрийг 2020-2024 онд хэрэгжүүлэх төлөвлөгөөний хүрээнд иргэдэд чиглэсэн Хүний хөгжлийг гол зорилтоо болгосон бодлого үйл ажиллагаанууд хэрэгжүүлж байгаа билээ. Орхон аймгийн Засаг даргын Тамгын газар гуравдугаар сараас эхлэн “Жендерт суурилсан хүний эрхийг хүндэтгэх” аяныг нийт дөрвөн сарын хугацаанд зохион байгуулж буй. Аяны хүрээнд өнгөрөгч дөрөвдүгээр сарыг "Хөгжлийн бэрхшээлтэй иргэдийн хөгжил оролцоо"-ны сар болгосон. Харин энэ сарыг “Гэр бүлийн хөгжлийг дэмжих, оролцоо”-ны сар болгон зарлаж, өнөөдөр гэр олгох үйл ажиллагааг зохион байгууллаа. Иргэдэд гэр олгох асуудлыг Аймгийн ИТХ-аар төсвийг баталж өгснөөр орон нутгийн Өмчийн газраас худалдан авах ажиллагааг зохион байгуулж, 50 өргөө цагаан гэр эзэддээ очлоо.