“Тавантолгой түлш” ХХК-иас өвөлжилтийн бэлтгэл ажил болон цаг үеийн асуудлаар мэдээлэл хийлээ.

"Тавантолгой түлш" ХХК-ийн Нүүрс боловсруулах үйлдвэрийн дарга Х.Галымбек" Манай үйлдвэр 10 шугамаар ажиллаж байна. Баруун үйлдвэрт долоо, зүүн үйлдвэрт гурван шугам ажиллаж өдөрт 1800 орчим тонн түлш үйлдвэрлэж байгаа. Түлшний эрэлт нийлүүлэлтийн хувьд өдөрт 1200 тонн түлш нийлүүлж байна. Шахмал түлшний барьцалдуулагч эдийн хувьд 13-14 хоногийн нөөцтэй байна. Энэ жилийн өвөлжилтийн бэлтгэлд өнөөдрийн байдлаар 114600 тонн түлшийг аюулгүйн нөөцөд нөөцөлсөн. Борлуулалтын хувьд энэ жилээс Налайх дүүрэг агаарын чанарын бүсэд шинээр нэмэгдсэн. Одоогийн байдлаар нийтдээ 450 борлуулалтын цэгийн үйл ажиллагаа хэвийн явагдаж байна. Ирэх сарын эхээр 200 нь борлуулалтын цэгийг нэмэлтээр ажиллуулна" гэлээ.

“Тавантолгой түлш” компанийн Хэрэглэгчдэд үйлчлэх албаны дарга Ч.Буянжаргал" Налайх дүүрэгт 7620 айл сайжруулсан шахмал түлш түлэх судалгаа гарсан. Бид уг дүүрэгт угаарын хийн хордлогоос урьдчилан сэргийлэх 30 хүний бүрэлдэхүүнтэй багийг ажиллуулж байна. 2022 оны галлагааны улирал эхэлснээр нийт 253 иргэн угаарын хийн хордлогод өртсөн байгаа. Өвөлжилтийн бэлтгэл ажлын хүрээнд "Яндангаа хөөлье" аян үргэлжилж байна. Бидний хувьд зорилтод бүлгийн айл өрхийн янданг хөөлж байгаа. Галлагаа эхэлж байгаа энэ цагт иргэд яндангаа хөөлж, зуухны битүүмжээ шалгах, угаарын хийн мэдрэгчийг хэвийн ажиллаж байгаа эсэхийг хянах шаардлагатай. Мөн бид айл өрхүүдээр судалгаа явуулахад  90 орчим хувь айл өрх стандартын шаардлага хангаагүй уламжлалт зуух ашиглаж байна. Сайжруулсан шахмал түлш нь маш өндөр градуст халдаг учраас зориулалтын бүрэн шаталттай зууханд түлэх ёстой. Иймд иргэд, айл өрхүүд зориулалтын зуух ашиглаж угаарын хийн эрсдэлээс гэр бүлээ хамгаалаарай гэж зөвлөж байна "гэв.