МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын эхний шатны цувралын дөрөв дэх тоглолтууд боллоо. 

Хасын Хүлэгүүд баг маш өрсөлдөөнтэй ширүүн тоглолтын эцэст 83-76 харьцаатай IHC Apes багийг хожиж цувралыг 3-1 болголоо. Ингэснээр Хасын Хүлэгүүд баг хагас шигшээд шалгарахад ганцхан хожил үлдсэн бол IHC Apes баг цувралын үлдсэн тоглолтуудад хожигдох эрхгүй болж байна.

Тоглолтын баатар: Хасын Хүлэгүүд багийн ахлагч Б.Билгүүн 21 оноо авч багийнхаа бүх тоглогчдыг тэргүүлсэн юм. Мөн шинэ легионер тоглогч Роналд Дельф Хасын Хүлэгүүд багийн өмсгөлтэй хамгийн сайн тоглолтоо үзүүлж 17 оноо, 6 самбар авлаа.

Тоглолтын эргэлтийн цэг: Тоглолтод Хасын Хүлэгүүд баг 37:24 секундын турш онооны илүү явсан бол IHC Apes баг 9 секунд онооны илүү байжээ. Тоглолтыг эхнээсээ л Хасын Хүлэгүүд багийн онооны илүү өрнөж байсан юм. Дөрөвдүгээр үеийн цаг сүүлийн 5 минут руу ороход IHC Apes баг 10-0 run хийж 76-74 болгож ойртуулсны араас Хасын Хүлэгүүд багийн хамгаалагч Т.Мэндбаярын бөмбөг таслалт, Роналд Делфийн сул амжилттай гүйцэтгэсэн довтолгоо 4 онооны зөрүүг бий болгосон билээ.

Статистик худлаа хэлдэггүй: Хожигдол амссан IHC Apes баг өнөөдөр багаараа 9 оновчтой дамжуулалт өгсөн бол хожил авсан Хасын Хүлэгүүд баг хоёр дахин их буюу багаараа 18 оновчтой дамжуулалт өгчээ.