МСБХ-ны Үндэсний Дээд лигийн 2022/23 оны улирлын эрэгтэй лигийн плэйоффын эхний шатны цувралын дөрөв дэх тоглолтууд боллоо. 

Баасан гарагийн үдшийн оргил тоглолт Завхан Бродерс болон М Гарьд багуудын хооронд болж өндөрлөлөө. Өчигдөр Завхан Бродерс баг 97-89 харьцаатай хожил байгуулж цувралыг тэнцүүлсэн юм. Цувралын харьцаа 2-2.

ТОГЛОЛТЫН БААТАР: Э.Дөлгөөн 24 оноо, 12 самбар авч дабл дабл гүйцэтгэлээ. Мөн Завхан Бродерс багийн холбогч Д.Мөнхтүвшин 18 оноо, 4 самбар, 6 оновчтой дамжуулалт, өгч холын зайнаас 4 шидэлт амжилттай гүйцэтгэжээ.

ТОГЛОЛТЫН ЭРГЭЛТИЙН ЦЭГ: Тоглолтын турш хоёр багийн онооны тэргүүлэл өөрчлөгдөж өрсөлдөөнтэй тоглолтыг үзүүлж байлаа. Нийт 14 удаа хоёр багийн онооны тэргүүлэл солигдож, 8 удаа онооны харьцаа тэнцсэн байна. Завхан Бродерс багийн хожил авсан гол шалтгаан, эргэлтийн цэг тоглолтын онооны харьцаа 72-77 байхад 14-0 run хийж 86-77 буюу 9 онооны тэргүүллийг авч чадсан билээ.

СТАТИСТИК ХУДЛАА ХЭЛДЭГГҮЙ: Хоёр баг бүх талаараа ойролцоо статистикийг үзүүлсэн юм. Хожигдол амссан М Гарьд баг сэлгээ 25 оноо авсан бол хожил авсан Завхан Бродерс багийн сэлгээ 45 оноо авчээ.