FIBA 3x3 сагсан бөмбөгийн Азийн аварга шалгаруулах тэмцээн Сингапур улсад болж байна. Зургаа дахь удаагаа зохион байгуулж буй тус тэмцээнд Монгол Улсын эрэгтэй шигшээ баг эхний тоглолтоо хийж Тайваны багийг 21:19-ийн харьцаагаар буулган авсан юм. Тус тоглолтод А.Ананд 10 оноо авсан бол Д.Дэлгэрням 8 оноог багтаа авчирлаа. Харин хоёр дахь тоглолтоо Сингапурын багтай хийж 22-9 харьцаагаар хожлоо. Улмаар хэсгээ тэргүүлж маргааш хасагдах шатанд Казакстаны багтай 14:35 цагт тоглоно. Монгол Улсын эрэгтэй багийн бүрэлдэхүүнд Д.Дэлгэрням, Э.Дөлгөөн, А.Ананд, О.Энхбаатар нар багтсан юм.

Харин эмэгтэй шигшээ Шинэ Зеландын багт 10-17 харьцаагаар хожигдсон бөгөөд хэсгийн сүүлийн тоглолтоо Малайзын багтай хийж 21-8 харьцаагаар хожиж хэсгээсээ хоёроор гарлаа. Улмаар хасагдах шатанд Хятадын багтай 13:45 цагт тоглоно. Монгол Улсын эмэгтэй багийн бүрэлдэхүүнд Б.Ариунцэцэг, М.Цэрэнлхам, О.Хулан, Ц.Болорцэцэг нар багтсан юм.