Манай улсад нярайн эрчимт эмчилгээний тоног төхөөрөмж, эмнэлгийн тусламж үйлчилгээг сайжруулах зорилготой “Save angels” төсөл 2015 оноос хойш жил бүр хэрэгжиж байна.

Уг төслийг НҮБ-ын харьяа, дэлхийн олон улс оронд үйл ажиллагаа явуулдаг “JСI Монгол” байгууллага, түүний “Сhairman” салбараас эрхлэн хэрэгжүүлдэг.

“JСI Chairman” салбар байгууллага төслөө өөрсдийн гишүүдийн хүрээнд санхүүжүүлж, 1 тэрбум гаруй төсөвт өртгийн хүрээнд олон мянган бяцхан үрсэд тусалж, тэдгээр гэр бүлүүдэд элэг бүтэн аз жаргал бэлэглэсэн юм.

Энэ удаад 2023 оны төслөө эх орны зүүн бүсийн хүн ам, алслагдсан газар нутаг ихтэй Сүхбаатар аймагт хэрэгжүүлж, аймгийн Эрүүл мэндийн төвд нэн шаардлагатай 66.5 сая төгрөгийн өртөг бүхий нярайн эмчилгээний тоног төхөөрөмжийг хүлээлгэн өглөө. Уг багцад 18 төрлийн 22 ширхэг тоног төхөөрөмж багтжээ.

“SAVE ANGELS-2023” төсөл арга хэмжээнд “JСI Chairman” салбар байгууллагын энэ оны Ерөнхийлөгч А.Батгэрэл, Сүхбаатар аймгийн Эрүүл мэндийн төвийн дарга Д.Алтантуяа тэргүүтэй хоёр талын зочид оролцож, орон нутаг дахь нярайн эрчимт эмчилгээний ахиц дэвшил, тоног төхөөрөмжийн хүрэлцээ ямар байгаа зэрэг асуудлаар санал солилцож, хамтран ажиллалаа.

Сүхбаатар аймгийн ЭМТ өнгөрсөн хугацаанд эх-нярайд үзүүлэх яаралтай тусламж үйлчилгээ, урьдчилан сэргийлэх ажлын үр дүнгээрээ бүс нутгагтаа тэргүүлж ажилласан байна. Энэ оны 1, 2-р улиралд 14 дутуу нярайг амжилттай бойжуулаад байна.

Хамгийн гол нь ээжүүдийн эрүүл мэндэд анхаарч, урьдчилан сэргийлэх, зөвлөх үйлчилгээг анхан шатны эмнэлгийн байгууллагууд сайтар хэрэгжүүлж чадвал дутуу нярайн эрсдэл бага байдаг гэж эмч, ажилтнууд ярьж байлаа.

“JСI Chairman” салбарын “Save angels” төсөл нь JCI Монгол байгууллага төдийгүй, манай улсад үйл ажиллагаа эрхэлж буй ТББ-уудын хэмжээнд томоохонд тооцогдох, цаг үеэ олсон төсөл юм.