Нийслэлийн түргэн тусламжийн төвийн сургалт, гадаад харилцааны албаны дарга Б.Тэгшжаргалтай ярилцлаа. 

-103 энэ цаг үед хэр өндөр ачаалалтай ажиллаж байна?

-Улирлын байдлаасаа хамаараад дуудлагын ачаалал ихсэх, багасах тохиолдол байдаг. Манай дуудлагын оргил ачааллын үе бол намар болон өвлийн улирал.  Дийлэнх нь томуу томуу төст өвчлөлийн дуудлага байдаг. Зуны улиралд дуудлага ихсэх тохиолдол байна. Үүнд, даралт ихсэх, зүрх судасны өвчтэй холбоотой дуудлага хамгийн их ирдэг. Түүнлэн гадаад орчны гэмтлийн дуудлага, ахуйн хүрээний дуудлага ихэсдэг. 

-Энэ сард ихэвчлэн ямар төрлийн дуудлагууд зонхилсон бэ 

-Нарших, хоол боловсруулах эртхэн тогтолцоо, бага насны хүүхдийн суулгат, зам тээврийн ослуудын дуудлага зонхилсон.  

-Орон нутагт мөн ижил үү?

-Ер нь бол төстэй. 

-Нийт зонхилох дуудлагын 70 орчим хувийг зүрх болон дотрын өвчлөл эзэлж байна гэж байна гэлээ. Ямар шалтгаантай байдаг юм бол?

-Нэгдүгээрт зүрх судас, хоёрдугаарт хавдрын шалтгаант нас баралтууд, гуравдугаарт осол гэмтлийн дуудлага орж байна. 1990-ээд оноос хойш 2000 оны эхээр осол гэмтлийн дуудлага тэргүүлж байсан байдаг. Дэлхийн хэмжээнд осол гэмтлийн шалтгаант нас баралт 9.8 хувийг эзэлж байна. 

-Иргэд яг ямар тохиолдолд 103 руу хандах ёстой вэ? 

-Яаралтай тусламж гэдэг нь тухайн дуудсан газраас эмнэлэг хүртэлх тусламжийг үзүүлдэг. Дуудлагыг бид эрэмбэлдэг. ЭМ-ийн сайдын тушаалын дагуу ажилладаг. Тэргүүлэх дуудлага бол амь тэнэсэн үеийн дуудлагууд. Энэ нь амьсгал тасалдсан, аминд халтай хэм алдалт үүссэн үед манайх нэн яаралтай очих ёстой дуудлага байдаг. Хоёрдугаарт, осол гэмтлийн дуудлага, гуравдугаарт бага насны хүүхдийн дуудлага орно. Хүүхэд гэдэг өөрөө биеийн байдлаа бүрэн илэрхийлж чадахгүй уйлагнах байдлаар зовиур шаналлаа илэрхийлдэг учраас түүний цаана ямар эмгэг байгааг мэдэх боломжгүй учраас бид илүү анхаарал хандуулдаг. Иргэд өрх, дүүргийн эмнэлэгтээ үзүүлээд эмчилгээ тусламж авчих байхад 103-руу их залгадаг. Ийм байдлаас шалтгаалж амь тэнэсэн яаралтай дуудлага цалгарддаг. Хугацаа алдах тохиолдол их байдаг учраас иргэд маань дуудлага дуудах шаардлагатай эсэхээ ойлгодог байх хэрэгтэй. Иргэд 103 ирэхдээ хугацаа алддаг гэдэг. Угтаа орж ирсэн дуудлагыг эрэмбэлээд аль нь илүү яаралтай амь тэнэсэн дуудлага байна, тэрийгээ түрүүлж гаргаснаараа цаг хождог. Харьцангүй хүлээгдэх боломжтой дуудлагыг түр хойшлуулах боломжтой гэж үздэг. Гэхдээ иргэдийн утсаар орж ирж байгаа бүх дуудлагыг авч байгаа. 

-Өдөрт хичнээн дуудлагад хэдэн баг ажилладаг вэ?

-Нийслэлийн иргэддээ 24 цагаар эрүүл мэндийн тусламж үйлчилгээ үзүүлж байна. Хоногтоо 40 баг гарч ажилладаг. Дүүрэг бүрт түргэн тусламжийн төвийн салбарууд байснаараа нэгж хугацаанд очих цагийг хэмнэж, тусламжийг хурдан шуурхай найдвартай үзүүлдэг болсон. Манай дуудлагын эмч нар маань бүрэн бэлтгэгдсэн, сургалтад тогтмол хамрагдсан дээрээс нь төрөлжсөн нарийн мэргэжлийн эмч нар тодорхой хэмжээний хувийг эзэлдэгээс гадна тусламжийг сайжруулах зорилгоор яаралтай тусламжийн эмч нар маань зөөврийн хялбаршуулсан зүрхний цахилгаан аппаратыг авч явж оношилгоо эмчилгээ үзүүлж байгаа. Түүнчлэн халаасны эхо аппаратыг бүрэн эзэмшсэн байдаг учраас газар дээр нь хурдан шуурхай үнэлэх боломжтой болсон давуу талтай. 

-Нийслэлд 40 баг өдөртөө дуудлагад явж байна гэлээ. Хангалттай хүрэлцдэг үү?

-Бид дуудлага бүрд хүрч ажиллаж байна. Гэхдээ олон улсын жишигтэй ойртохгүй. Хамгийн багадаа 24 цагт 150 машин дуудлагад гарч байж илүү чанартай тусламж хүрч, цаг хугацаа хэмнэгдэх боломжтой юм. Бид аль болох дэлхийн жишигт ойртлууахыг хичээж ажиллаж байна. 

-Нэг эмчид ногдох ачаалал өндөр байдаг уу?

-Эмч дээр ирэх ачааллыг зөв тэнцвэртэй хуваарилан ажиллуулж байна. 

-Дуудлагын цагийн хувьд аль цагт илүү ачаалал ихтэй байдаг гэх зүйл байх уу?

-Дуудлагын ачааллын оргилын үе ажлын өдрүүдэд 17-22 цаг хүртэл их байдаг. Эрсдэлтэй дуудлага гээд үзвэл шөнийн 24:00 цагаас үүрийн 05 цаг хүртэл байдаг. Хүн унтаж амарч байх цагт түргэн дуудна гэдэг амин үзүүлэлт ямар нэгэн байдлаар доголдсон асуудал гарсан дохио өгч байгаа хэрэг. 

-Түгжрэлийн асуудал түргэний машинд хэр нөлөөлж байна вэ?

-Сүүлийн үед иргэд маш хурдан зам чөлөөлж өгдөг болсон. Замын цагдаа нар маш сайн ажилладаг. Харилцан тодорхой саад бэрхшээлийг хамтдаа даван туулж чадаж байгаа. Манай дуудлага цахим системд орчихсон байдаг учраас бүх дуудлагыг GPS ээр харж тогтоодог.