Барилга хот байгуулалтын сайд Ц.Даваасүрэн “Шинэ Хархорин” хотын бүтээн байгуулалтын талаар дөнгөж сая мэдээлэл өглөө.

Тэрбээр "Сүүлийн үед Хархорин хотыг, мөн нисэх буудал, хурдны галт тэрэгний замыг нь бариад өгье гээд яянз бүрийн хүмүүс гарч ирж байна. Хэн нэгэн шантаажлаад Хархоринд газар авч, байшин бариад Улаанбаатар шиг хот босгох зүйл байхгүй. Олон улсын стандартын дагуу Хархорин хот байгуулагдана.

Ерөнхийлөгч болон сайд нар гаднын компанийнхантай уулзалт хийхдээ Гадаад харилцааны яамаар дамжиж нэг цонхны бодлогоор харьцдаг. Хархорин хот төлөвлөлтгүй хот болохгүй. Хархорин хотыг байгуулах газраа ч сонгосон байгаа. Хархорин хотыг байгуулах газраа сонгоод системээс газар олголтыг зогсоосон. Тэнд газар олголт хийгдэхгүй.

Газрын геодезийн судалгааг хийж усны нөөц болон хот байгуулах хөрс шороотой эсэхийг тогтооно. Судалгааны ажлын дараа аль хэсэгт орон сууцны хороолол байх вэ гэдэг орон зайн төлөвлөлтийг хийх юм. Үүнд нэлээд хугацаа шаардана. Ингэсний дараа хөрөнгө оруулалт болон бүтээн байгуулалтын ажлууд хийгдэнэ.

Тэр үед хөрөнгө оруулалтыг агентлаг, яамдаар дамжуулан хийнэ. Гаднын компанийг том, жижиг гэж буруутгахгүй.

Бид хот байгуулж байсан туршлага муу учраас орчин үеийн архитектор болон төлөвлөгч нарын арга зүйгээс суралцах шаардлага бий. Астана хотыг байгуулахад оролцсон мэргэжилтнүүд гаргасан алдаагаа хэлж, давтахгүй байхыг зөвлөсөн. Бусдын сайн туршлагыг нэвтрүүлбэл цаг хугацаа хожиж, хөрөнгө мөнгө хэмнэх нөхцөл бүрдэнэ.

Уламжлалт ахуй соёлдоо түшиглэсэн, ухаалаг, ногоон хот гэсэн хослуулсан төлөвлөлтийг хийнэ. Төлөвлөлтийн хувьд олон улсын туршлагатай архитектор, компаниудтай хамтран ажиллана. Бид Астана, Дубай зэрэг хотыг барьж байгуулахад оролцсон, Хятадын томоохон гүүр, барилгын байгууламжийн архитекторчдыг урьж, уулзалт хийсэн” хэмээн ярилаа.