Нийслэлийн Засаг даргын тамгын газар, Улаанбаатар хотын захирагчийн албаныхан нийслэлийн нийтийн тээврийн автопаркийг сайжруулах хүрээнд хуучин, засварлаж угсарсан автобус оруулж ирсэн нь илэрч бөөн дуулиан дэгдээд удаагүй байна. Гэтэл Дорноговь аймагт 12 настай охин алга болж харгис алуурчны гарт амиа алдсан аймшигт хэрэг мандаж олон нийт ёстой нөгөө салан баавгайн үлгэр гэгчээр ногоон автобусны хэргийг мартагнан хэдэн хоног л уйлаг алдлаа. Ингэхээс ч аргагүй. 

Харин ард түмний мөнгөөр гараа угааж, нэлээд хэсгийг нь гэрээдээ зөөсөн эрх баригчид, дарга нар энэ дуулианаар булхай бузраа нуун далдалж албан тушаалаасаа огцорсон гэдгээр халхавчлан хэргийг замхруулчих вий дээ. 
Нийслэлийн “түгжрэлийн” сайд Ж.Сүхбаатар нь улс төрийн соёл гарган огцорч байна хэмээн өндөр дуугаар зарласныхаа маргааш л УИХ-ын Хуульзүйн байнгын хороон дарга болж томорсон. 

Нийслэлийн Засаг дарга Улаанбаатар хотын захирагч Д.Сумъяабазар нь  мөн л хариуцлагагүй муу ажилласнаа хүлээн зөвшөөрч өвдгөө хүртэл мэхийн албан тушаалаасаа огцорсон ч одоогоор яах нь мэдэгдэхгүй гэртээ хэвтэж байгаа. Санаанд нь бол нэг хэсэг ингэж олон түмнийг мартагнуулж байгаад УИХ-д нэр дэвших,  болбол намын жагсаалтад багтчих санаатай байхыг үгүйсгэхгүй. 

Монголын талаас дөрөв, солонгосын хоёр иргэнийг хорьж цагдан хорих хугацааг нь сунган шалгаж байгаа ч одоогоор ямар нэгэн шинэ мэдээлэл байхгүй л байна. 

Дээр нь Монгол Улсын Ерөнхий сайд нийслэлийн худалдан авах ажиллагааны талаар бүхэлд нь шалгаж нягтал, ямар нэг юм илэрвэл битгий гомдоорой гээд нам нэгтнүүддээ хэлчихсэн. 

Хэрвээ хууль хяналтынхан үнэхээр шударга л юм бол “Ногоон автобусны” хэрэг олон юм руу хөтлөх учиртай. Томоос нь дурдахад л гудамж цэвэрлэх машин нэртэй оруулж ирсэн тоос сорогч, үүний өмнө оруулж ирсэн улаан автобуснууд, түргэний тэрэг, цагдаагийн машинууд, гал сөнөөгч машин гээд энэ олон худалдан авсан техникийн жинхэнэ үнэ ямар байсан, МАН-ын шат шатны эрх баригчид ямар үнээр оруулж ирсэн гээд  чин үнэнчээр ухаж төнхвөл мөн ч их юм гарна даа. Тэгээд л сургууль цэцэрлэгийн хоолны мөнгө, энэ гудамж талбайн засвар, зүв зүгээр байсан замын хашлагыг байсхийгээд л сольдог, хуучныг нь өөр нэг газар шахдаг гээд хотынхны бизнес барагдахгүй. Манай нэг уран сайхны кинон дээр “Хүрээний бузрыг уудалбал ч далай далай” гэдэг шиг манай энэ хэдэн дарга нар, ер нь МАН-ын шат шатны албан тушаалтнууд нэг их эх оронч үнэнч шударга байснаа гэнэт л энэ нэг хэдэн ногоон автобусаар ард түмнээ хулхидахаар шийдсэн гэвэл түүн шиг худал зүйл үгүй. 

Тэгэхээр АТГ, цагдаагийн газар, прокурор, шүүхийнхэн маань үнэхээр шударга юм бол, МАН-ын дарга, Ерөнхий сайдын өгсөн үүргийг чин үнэнчээр биелүүлэх ёстой юм бол үүр уурхайг нь уудлаад бүүр нэг илчлээд өгөөсэй билээ. 

Ер ямар нэг булхай бузар нь илрээд ирэхээр өөр нэг дуулиан үүсгэж олон түмний анхаарлыг сатааруулж байгаад булхай бузраа сэмхээн мартагнуулж орхидог нь манай энэ МАН-ын бүүр ужгирсан хуучин арга барил. Яг нарийн шалгаж нягтлаад ухаж төнхөөд эхэлбэл УИХ-ын Хуульзүйн байнгын хороон дарга болоод байгаа, түгжрэлийн сайд асан Ж.Сүхбаатар, хотын мэр байсан Д.Сумъяабазар нар ч нэг их тааваараа тарвалзаж үлдэхгүй л болов уу. Хуулийнхны өргөсөн тангарагтаа хэр үнэнчийг л харж байя. 

Ногоон автобусны хэрэг шийдэгдээгүй байгаа шүү хэмээн өглөө бүрий сануулж байхад илүүдэхгүй л болов уу.

Эх сурвалж: Монголын мэдээ сонин
2023 оны аравдугаар сарын 09. Даваа. №156 (5884)