Электрон тоглоомын CS2-ын төрлийн энэ жилийн сүүлийн хамгийн том тэмцээн болох "Perfect World Shanghai Major 2024" тэмцээний Ази, Номхон далайн урьдчилсан шат буюу "Asia-Pacific RMR" болж байна.

Шанхайн мажорт оролцох гурван эрхийн төлөө Ази, Номхон далайн шилдэг найман баг хүч үзэх тэмцээнд монголын "The MongolZ" баг оролцож байгаа бөгөөд эхний тоглолтоо уржигдар буюу арваннэгдүгээр сарын 11-ний өдөр Alter Ego багтай тоглож 13:8 харьцаагаар манай баг хожлоо. Харин Шанхай мажорт оролцох эрхийн төлөө өчигдөр буюу арваннэгдүгээр сарын 12-ны өдөр DRILLAS багтай гурван газарт тоглож (Mirage 11-13, Ancient 13-2, Anubis 13-5) харьцаагаар хожсоноор өөрсдийн гурав дахь стикерээ гаргахаар болсон юм. Мөн bLitz, Techno4K нар тав дахь мажортоо дараалан оролцохоор болсон байна.

Харин нөгөө талд Хятадын "Rare Atom" баг Оросын "GR Gaming", Австралийн "TALON" багуудыг хожиж мажорын хоёр дахь эрхийг халаасалсан. Сүүлийн эрхийн төлөө өнөөдөр монгол дасгалжуулагчтай Австралийн "FlyQuest" баг DRILLAS багтай тоглоно. Улмаар хожвол Talon болон Хятадын Lynn Vision Gaming багуудын ялсантай нь тоглоно.

Манай багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.