Бүгд Найрамдах Улсаа тунхаглаж, Анхдугаар Үндсэн хуулиа баталсны 100 жилийн ойн энэ өдөр Баянгол дүүргийн 34 хорооны 16 настнуудын төлөөлөл Иргэний андгай өргөлөө. Ёслолыг нээж дүүргийн Иргэдийн Төлөөлөгчдийн Хурлын дарга П.Өлзийнаран хэлсэн үгэндээ, “Монгол хүн бүр тусгаар тогтнолынхоо төлөө тэмцэж явсан өвөг дээдсээрээ, их түүхээрээ бахархан хүндэтгэх энэ эрхэм өдөр та бүхэн амьдралдаа шинэ хуудас нээж, эх орныхоо бүрэн эрхт иргэн болж Иргэний андгайгаа өргөж байна. 16 нас гэдэг бол хүүхдээс залуу хүн гэсэн тодотгол руу шилжиж, хариуцлагатай, бие даан шийдвэр гаргах, аливаа зүйлд үнэлэлт дүгнэлт өгөх, улс орныхоо ачаанаас хамтдаа үүрэлцэх, алдаа оноог хамтдаа хуваалцах нас. Хүн бүрт боломж бий. Тиймээс аливааг чин сэтгэлээсээ хийдэг, зөв хандлагатай, зөв төлөвшсөн, өрсөлдөх чадвартай, дэлхийтэй хөл нийлүүлэн алхах чадвар эзэмшсэн хариуцлагатай иргэн болоорой” гээд амжилт хүсэж, баяр хүргэлээ. Монгол Улсын Ерөнхий сайдын ивээл дор жил бүрийн 11 дүгээр сарын 26-нд 16 нас хүрч иргэний үнэмлэхээ гардан авч буй хүүхдүүд Иргэний андгай өргөдөг. Энэ жил 22 дахь удаагийнх бөгөөд Анхдугаар Үндсэн хуулиа баталсны 100 жилийн тэгш ой тохиож буйгаараа онцлог юм.