Электрон тоглоомын Counter strike-2-ын хамгийн том тэмцээн болох "Perfect World Shanghai Major 2024" тэмцээн болж байна. 1,250,000 ам.долларын шагналын сантай тэмцээнд Монголын "The MongolZ" баг эхний шат буюу "Opening Stage"-ийг 3 хожилтойгоор тэргүүлж дараагийн шат болох "Elimination Stage" шатанд өрсөлөхөөр болсон билээ.

Тэгвэл тус шатны тэмцээнд өнөөдөр /2024.12.05/ эхэлж байгаа бөгөөд Ази-Номхон далайн бүсийн цор ганц төлөөлөл Монголын "The MongolZ" баг эхний тоглолтоо дэлхийн чансааг тэргүүлэгч "G2 Esports"-той хийж Inferno-д 13-10 харьцаагаар хожлоо. 

Ийнхүү тэд 1-0 амжилттай болсон ба өнөөдөр үдээс хойш дахин нэг удаагийн Bo1 тоглолтыг хийнэ. 

Дэлхийн шилдэг 24 баг гурван шат дамжин тоглох энэхүү электрон спортын оргил тэмцээний эхний буюу "Opening Stage" шатны тоглолтууд швейцар системээр болсон билээ. Хамгийн түрүүлж гурав хожсон найман баг хоёр дахь буюу "Elimination Stage" шатанд шалгарч, Европын урьдчилсан шатнаас шууд эрхээ авсан найман багтай нийт 16 баг оролцож байна. Тэднээс хамгийн түрүүнд гурав хожсон найман баг плэй-оффт шалгарах бол гурав хожигдсон найман баг тэмцээнийг орхино.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.