Баянгол дүүргийн иргэдийн Төлөөлөгчдийн Хурал, Гэмт хэргээс урьдчилан сэргийлэх ажлыг зохицуулах салбар зөвлөлөөс Цагдаагийн ерөнхий газрын Хар тамхитай тэмцэх газартай хамтран хүүхэд өсвөр үе, залуучуудад мансууруулах эм, сэтгэцэд нөлөөт бодисын талаар мэдээлэл өгөх, гэмт хэрэг, зөрчилд холбогдохоос урьдчилан сэргийлэх, эрүүл, зөв дадлыг төлөвшүүлэх зорилгоор нөлөөллийн арга хэмжээнүүдийг авч буй.

Энэ хүрээнд дүүргийн нутаг дэвсгэрт үйл ажиллагаа явуулдаг их, дээд сургуулийн оюутнуудын дунд “Мансууралгүй ирээдүй” сэдэвт дэвжээ тэмцээнийг өнөөдөр /2024.12.12/ зохион байгууллаа. Тэмцээнд 8 баг оролцож, мэдлэг, ойлголт, авьяас чадвараараа өрсөлдөн, шилдгүүдээ тодруулав. Үүнд,

-МҮИС-ийн “Цаглашгүй” баг 66 оноогоор ТЭРГҮҮН байрт шалгарч

-Төмөр замын дээд сургуулийн “Infinity” баг 56 оноогоор ДЭД байр

- МҮИС-ийн “Omega” баг 52 оноогоор ГУТГААР байр эзлэв.

Тэмцээнд оролцсон бүх оюутнууддаа баяр хүргэж, амжилт хүсье.

Нөлөөллийн арга хэмжээний хүрээнд мөн өнгөрөгч 11 дүгээр сард 12 их, дээд сургуулийн 1500 оюутныг “Мансууруулах эм, сэтгэцэд нөлөөт бодисын хор уршиг, хууль эрх зүйн хариуцлага” сэдэвт сургалтад хамруулсан билээ.

Манай улс бол залуучуудын орон. Хүн амын талаас илүү хувь нь эх орныхоо ирээдүйн эзэд болсон хүүхэд, залуучууд. Гэхдээ өнөөдөр мансууруулах эм, сэтгэцэд нөлөөт бодисын хэрэглээ хүүхэд, залуучуудын дунд аюулын харанга дэлдэх хэмжээнд хүрснийг сүүлийн жилүүдэд бүртгэгдсэн гэмт хэрэг, зөрчил харуулж байгаа. Судалгаагаар хүүхэд, залуучууд энэ төрлийн бодисын хор хөнөөлийн талаар мэдлэг мэдээлэл дутмагаас бусдад уруу татагдах, найз нөхдийнхөө ятгалгаар хэрэглэж эхлээд донтсон тохиолдол их байдаг. Тийм ч учраас өсвөр үе, залуучуудад чиглэсэн нөлөөллийн арга хэмжээнүүд чухал ач холбогдолтой юм.

Баянгол дүүргийн иргэдийн Төлөөлөгчдийн Хурал, Гэмт хэргээс урьдчилан сэргийлэх ажлыг зохицуулах салбар зөвлөлөөс цаашид ч залуучуудынхаа төлөө, “Мансууралгүй Баянгол” дүүргийн төлөө онцгой анхаарч ажиллана.

Мансууралгүй ирээдүйн төлөө-Хамтдаа