Монголын Морин спорт, уяачдын холбооноос мэдээлэл хийлээ.

Монголын Морин спорт, уяачдын холбооны төлөөлөл "Монгол Улсын Засгийн газрын тогтоолтой холбоотойгоор хэвлэлийн хурал зарлаж байна. Харвын хурдан морины уралдааныг сэргээх хүсэлтийг бидэнд холбогдох газрууд өгсөн. Уг хүсэлтийг Монгол Улсын Засгийн газарт хүсэлтээ хүргүүлсэн. Үндсэндээ дөрвөн том асуудлыг дэвшүүлсэн. Нэгдүгээрт, уралдаанч хүүхдийн аюулгүй байдлыг хангах асуудлыг дэвшүүлсэн. Мөн хурдан морины уралдааны замыг шинэчлэх, уралдаанч хүүхдийн эрүүл мэнд, боловсролыг анхаарахыг илэрхийлсэн. Цаг агаарын байдлыг харгалзана гэдгээ мөн илэрхийлсэн. Хавар болоод, гадаа дулаарсны дараа уралдаан зохион байгуулах саналаа хүргүүлсэн.

Гэвч шийдвэр өөрөөр гарч, хүүхэд хурдан морь унахыг хориглосон. Монголын Морин спорт, уяачдын холбоо 18 наснаас дээш насны хүн унасан хурдан морины ямар ч уралдаан зохион байгуулахгүй гэдгийг албан ёсоор мэдэгдэж байна. Бидний энэ шийдвэр 21 аймгийн сумд хэрэгжүүлнэ. Цаашид энэ байдал үргэлжилбэл наадмаар ч хүүхдээр морио унуулж чадахгүй байдалд хүрээд байна. Монголын Морин спорт, уяачдын холбоо 2025 оны хүүхдийн эрхийг хамгаалах жил болгон зарласан. Үндэсний өв соёлоо аварч үлдэхийн тулд олон улсаас тавьж буй шаардлагыг биелүүлж ажиллана.

Засгийн газар хаврын морин уралдаанд 18-аас дээш насны уралдаанчаар морь унуулах шийдвэр гаргасан. Энэ нь ямар ч судалгаа, тооцоололгүй шийдвэр учраас өөрчлөлт оруулах шаардлагатай гэж үзэж байна. Уяачид хүүхдийн эрхийг өв соёлоос дор үзсэн мэт ойлголт төрүүлэх мэдээлэл цахим сүлжээнд тарж байна. Монгол Улсын засгийн газар өв соёлын хагаралдаан үүсгэж байна. Холбооны гишүүд хуралдаж, хаврын уралдаантай холбоотой хэд хэдэн шийдлийг Засгийн газарт хүргүүлсэн. Нэгдүгээр хүүхдийн хамгаалалтын хувцас хэрэглэл. Хоёрдугаарт, уралдаанч хүүхдийн эцэг эх, асран хамгаалагчдаас зөвшөөрөл авах ёстой байдаг. Дээр нь нэмээд хүүхдийн өөрийн саналыг бас сонсдог байя гэсэн. Хүүхдийг албадан хөдөлмөрлүүлдэг зүйл байдаггүй. Уралдаанч хүүхдийн эрхийг нэн тэргүүнд хамгаалдаг хүмүүс уяач нар өөрсдөө. Олон улсын байгууллага хэзээ ч орон нутагт байгаа хүүхдийн эрхийг хамгаалахгүй. Нийт уяачдыг хүүхдийн эсрэг байгаа мэт ойлголт нийгэмд түгээж байгаа нь тохиромжгүй байна" гэв.