Сагсан бөмбөгийн Азийн Аваргуудын Лигийн Зүүн бүсийн урьдчилсан шатны тэмцээнд аваргын цомыг нь өргөсөн "Хасын Хүлэгүүд" баг Арабын Нэгдсэн Эмират Улсын Дубай хотноо Сагсан бөмбөгийн Азийн Аваргуудын лигт /Basketball champions league asia/ өрсөлдөж дууслаа.

Манай залуусын хүрэл медалийн төлөө зургадугаар сарын 13-ний өдөр Арабын нэгдсэн Эмират улсын Шабаб Аль-Ахли багтай тоглож 84-79 харьцаагаар хожиж хүрэл медалийн эзэд боллоо. Улмаар тус тэмцээн 1981 оноос эхлэж болж байгаа бөгөөд Монгол Улсын баг анх удаагаа оролцож хүрэл медаль хүртсэн бол Японы Уцуномия Брекс баг алтан медаль, Ливаны Аль-Рияди клуб мөнгө медаль хүртсэн байна.

Тус тоглолтод А.Азбаяр 28 оноо, 6 самбар, 2 таслалт, 2 хаалтаар багаа тэргүүлсэн бол Иан Миллер 19 оноо, 5 самбар, 9 дамжуулалт, Жордан Толберт 13 оноо, 11 самбар, 3 таслалт, 2 хаалтын гүйцэтгэсэн байна.

Сагсан бөмбөгийн Азийн Аваргуудын лигт 9 улсын баг оролцож байгаа бөгөөд гурван хэсэгт хуваагдсан. Манай залуус "А" хэсэгт БНХАУ-ын "Жэцзян Лайонс", Ираны "Табиат" багуудтай нэг хэсэгт орсон бөгөөд БНХАУ-ын "Жэцзян Лайонс" багтай тоглож хожсон. Хэсгийн сүүлийн тоглолтоо Ираны "Табиат" багтай тоглож хожигдсон билээ. Улмаар хэсгийн хоёрдугаар байраар гарсан юм.

Хасагдах шатны эхний өрсөлдөгч нь Филиппины лигийн аварга баг Мералко Болтс багтай тоглож 78-83 харьцаагаар манай залуус хожиж, медалийн төлөө Японы Уцуномия Брекс багтай тоглож 70-93 харьцаагаар ялагдал хүлээсэн билээ.