Хан-Уул дүүргийн хэмжээнд орон нутгийн өмчит дөрвөн байгууллага, хувийн хэвшлийн 10  компани нийтийн эзэмшлийн гудамж, замын цэвэрлэгээ үйлчилгээг хариуцан ажиллаж байна. Тус компаниуд нийт 3.8 сая ам метр талбайг цэвэрлэдэг. Нийслэл энэ онд цас цэвэрлэгээний 167 машинаар парк шинэчилсэн. Үүний 25 машиныг Хан-Уул дүүргийн Тохижилт үйлчилгээний төвд хүлээлгэн өгсөн юм.  Энэ хүрээнд тус төвийн авто баазад УБЗАА–ны Тохижилт, хог хаягдлын удирдлагын газрын дарга Г.Билгүүн болон холбогдох албаныхан ажиллалаа.

УБЗАА–ны Тохижилт, хог хаягдлын удирдлагын газрын дарга Г.Билгүүн “Нийслэлийн есөн дүүргийн зам талбайн арчилгаа үйлчилгээг хариуцан ажилладаг байгууллагуудад машин техникийн бэлэн байдал, тулгамдаж буй асуудалд зөвлөн туслах, хянан шалгах зорилгоор ажиллаж байна. Өчигдөр Хан-Уул дүүргийн Тохижилт үйлчилгээний төвд давс, бодисын нөөцтэй холбоотой асуудлыг шалгасан бол өнөөдөр тус төвийн авто баазад ажиллаж байна. Парк шинэчлэлтийн хүрээнд Хан-Уул дүүрэгт эргэн төлөгдөх нөхцөлтэйгөөр 25 цас цэвэрлэгээний машин техникийг хүлээлгэн өгсөн. Нийслэлийн хэмжээнд парк шинэчлэлт хийхээс өмнө судалгаа хийсэн. Судалгаагаар цас шүүрдэгч нэг жижиг машин найман хүний хийх ажлыг хөнгөвчилж байсан. Бид ТҮК-ийн ажилчдын хөдөлмөрийн ачааллыг багасгах зорилгоор гар багаж худалдан авах ажиллагааг зохион байгуулж байгаа. Мөн гар багаж буюу цас үлээгч, жижиг шүүрийг цас орохтой зэрэгцэн ажиллуулна. Ингэснээр цас дагтаршиж, цэвэрлэхэд хүндрэл үүсэхээс урьдчилан сэргийлнэ” гэв.

Хан-Уул дүүргийн Тохижилт үйлчилгээний төвийн захирал В.Мөнх-Эрдэнэ “Манайд давс цацдаг 6, цас түрж хусдаг 5 машин бий. Өдрийн ээлжийн машинууд зам, талбайг цэвэрлэж, давс, бодисоо цацаад ажиллаж байгаа бол оройн ээлжийн машинууд авто баазад байрлаж байна.Бүх машин техник хэвийн ажиллагаатай. Мөн зам, талбайн ажилчид 1.2-1.4 сая төгрөгийн цалин авдаг байсан бол өнөөдөр 3.5 сая төгрөгийн цалин авч байна. Ажилчид маань цалиндаа сэтгэл хангалуун байгаа” гэлээ.

Хан-Уул дүүргийн менежер Ц.Эрдэнэбаатар “Өглөө хөдөлгөөн эхлэхэд халтиргаа гулгаа үүсгэхгүйн тулд үүрээр машин, техникүүдийг тогтмол ажиллуулж байна. Түүнчлэн өгсүүр болон уруу зам, авто машины яндангийн ус тогтдог байршлуудад давс, бодис цацсан байх шаардлагыг тавьсан. Мөн хог тээвэрлэгч компанийн гүйцэтгэлтэй холбоотой асуудал гарсан тул хог тээвэрлэгч машины явсан цаг, км, ачсан жин зэрэгт хяналт тавьж  долоо хоног тутамд шалгаж байгаа” гэсэн юм.

Энэ үеэр УБЗАА–ны Тохижилт, хог хаягдлын удирдлагын газрын дарга Г.Билгүүн хүүхэд олноор зорчдог явган хүний замын цас цэвэрлэх ажлыг чанартай, цаг хугацаанд нь гүйцэтгэхийг Хан-Уул дүүргийн Тохижилт үйлчилгээний төвийн захирал В.Мөнх-Эрдэнэд үүрэг болголоо. Мөн энэ онд багтаан цас үлээгч, шүүрдэгч жижиг машиныг нэмэлтээр хүлээлгэн өгнө гэдгийг хэлсэн юм.