“Монгол Улсын Үндсэн хуулийн өдөр”-т зориулан Улсын Их Хурлаас уламжлал болгон зохион байгуулдаг Шатар сонирхогчдын улсын аварга шалгаруулах тэмцээний шувтаргын тоглолт өнөөдөр /2026.01.10/ Төрийн ордонд эхэллээ.

Улсын Их Хурал дахь Монгол ардын намын бүлгийн дарга Ж.Батжаргал тэмцээнийг нээж үг хэлэв. Тэрбээр, ирсэн зочдод Үндсэн хуулийн өдрийн мэнд дэвшүүлээд, оюун ухааны спортын хаан болсон шатрын спортоор монголчууд найман наснаас 80 настан хүртэл нас ялгалгүй тоглодгийг онцлов. Тэрбээр, энэ удаагийн тэмцээнд 87 насыг зооглож буй Донидын Найдан гуай хүрэлцэн ирснийг танилцуулаад энэ хүн Үндсэн хууль тогтоогчдын нэг Ардын Их Хурлын депатут гэдгийг тодотголоо. Өнгөрсөн жилүүдэд манай улсын тамирчид олон амжилт гаргаж, дэлхий нийтэд эх орныхоо нэрийг цуурайтуулсныг онцлон дурдаж, оролцогчдод амжилт хүсэв.

Үүний дараа Монгол Улсын Ерөнхий сайд, Шатрын холбооны ерөнхийлөгч Г.Занданшатар мэндчилгээ дэвшүүллээ. Ардчилал, шударга ёс, хүний эрх, эрх чөлөөг тунхаглан зарлаж, нийгмийн шинэчлэл, хөгжил дэвшлийн тулгуур болсон Монгол Улсын Үндсэн хуулийн өдрийн мэндийг өргөн дэвшүүлж, Үндсэн хуульт ёсоо дээдлэн сахих бахархах түүхт энэ өдөр шатар сонирхогчдын УАШТ-ийг УИХ-ын даргын ивээл дор уламжлал болгон 14 дэх жилдээ зохион байгуулж байгааг онцлов. 2012 онд Шатрын холбооноос энэхүү санаачилгыг гаргаж анх удаа 2012 онд тэмцээнийг зохион байгуулж эхэлснийг дурдаад, энэхүү тэмцээнийг зохион байгуулахад УИХ-ын дарга Н.Учрал гүн туслалцаа үзүүлж хамтран ажиллаж байгаад Монголын шатрын холбооны нэрийн өмнөөс болон нийт шатарчдынхаа нэрийн өмнөөс гүн талархал илэрхийллээ.

Мөн Дэлхийн шатрын холбооноос 2026 оныг шатрын боловсролын жил болгон тодорхойлж байгаа гэв. Түүнчлэн олон нийтэд шатрын ач холбогдлыг ухуулан таниулах, шатрын спортоор хичээллэгчдийн хүрээг тэлэх, тамирчдынхаа амжилтыг ахиулахын төлөө дэлхий даяар анхаарч ажиллаж байна гэлээ.

Тэмцээний эхэнд Улсын Их Хурал дахь Монгол ардын намын бүлгийн дарга Ж.Батжаргал Улсын Их Хурлын гишүүн О.Амгаланбаатар нар хүндэтгэлийн өрөг  нүүлээ.

Энэхүү тэмцээн сум, дүүргийн хүрээнд анхан шат, аймаг, нийслэлийн хэмжээнд хагас шигшээ, улсын хэмжээнд шигшээ гэсэн 3 үе шаттай зохион байгуулагддаг. Энэ удаа анхан шатны тэмцээн 2025 оны 12 дугаар сарын 06, 07-ны өдрүүдэд Монгол Улсын 331 сум нийслэлийн 9 дүүрэгт амжилттай зохион байгуулагдаж, 4922 шатарчин хамрагдсан нь өмнөх онтой харьцуулахад оролцогчдын тоо дөрвөн хувиар өссөн байна. Хагас шигшээ тэмцээн 2025 оны 12 дугаар сарын 20, 21-ний өдрүүдэд бүх аймаг болон нийслэлд нэгэн зэрэг болж, 696 шатарчин оролцож, өмнөх оноосоо есөн хувиар өссөн байна. Анхан шатын тэмцээнд хамгийн олон шатарчин оролцсон аймгууд тодорсон бөгөөд 409 оролцогчоор Баянхонгор, 319 оролцогчоор Говь-Алтай, 309 оролцогчоор Завхан шалгарчээ гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.