Засгийн газрын 2026 оны нэгдүгээр сарын 14-ний өдрийн хуралдаанаар Монгол Улсын гамшгаас хамгаалах төлөвлөгөөг баталлаа.

Монгол Улсад төдийгүй дэлхий нийтэд уур амьсгалын өөрчлөлт, хүний буруутай үйл ажиллагааны улмаас байгаль цаг уур, биологийн гаралтай аюулт үзэгдэл, гамшиг, ослын төрөл, тоо, давтамж, түүнээс учрах хохирол жил бүр өсөн нэмэгдэж, улс орны нийгэм, эдийн засгийн хөгжил, хүний эрүүл мэнд, амь нас, амьжиргаанд сөрөг нөлөө үзүүлж байна.

Өнгөрсөн жилүүдэд тохиолдсон цар тахал, зуд, үер зэрэг байгалийн гамшиг, аюул нь бүх шатны гамшгаас хамгаалах төлөвлөгөөг боловсронгуй болгох, удирдлага, зохицуулалтыг сайжруулах шаардлагатайг харуулсан.

Монгол Улсын Их Хурлын 2022 оны долоодугаар сарын 06-ны өдрийн “Монгол Улс дахь хүний эрх, эрх чөлөөний байдлын талаарх 21 дэх илтгэлийг хэлэлцсэнтэй холбогдуулан авах зарим арга хэмжээний тухай” 49 дүгээр тогтоолын 1 дэх хэсгийн 1.1-д Монгол Улсын Засгийн газарт Засгийн газрын 2015 оны 416 дугаар тогтоолоор баталсан "Гамшгийн аюулаас хүн ам, эд хөрөнгө, мал, амьтныг урьдчилан сэргийлэх, аврах, хор уршгийг арилгах хойшлуулшгүй сэргээн босгох арга хэмжээний төлөвлөгөө"-г шинэчлэн батлахыг даалгасан.

Энэхүү төлөвлөгөө батлагдсанаар гамшгийн эрсдэлийг бууруулах, гамшгийн үед хариу арга хэмжээг зохион байгуулах удирдлага зохицуулалт боловсронгуй болж, гамшгаас хамгаалах алба, яам, агентлаг, аймаг, нийслэл, сум, дүүрэг, хуулийн этгээдийн бэлтгэл бэлэн байдал хангагдаж, улсын хэмжээнд томоохон хэмжээний гамшиг, осол тохиолдсон үед хариу арга хэмжээ шуурхай зохион байгуулах нөхцөл бүрдэнэ гэж үзэж байна.

Монгол Улсын гамшгаас хамгаалах төлөвлөгөөтэй нийцүүлэн гамшгийн төрөл бүрээр салбар төлөвлөгөө, гамшгаас хамгаалах улсын болон орон нутгийн алба, аймаг, нийслэл, сум, дүүргийн гамшгаас хамгаалах төлөвлөгөөг шинэчлэн боловсруулж батлах юм.