УИХ-ын хаврын чуулганы хаалтын өдөр АН-ын бүлгээс Оюу толгойн асуудлаар Засгийн газрыг ил тод мэдээлэл өгөхийг шаардаж, хэлэлцээрийн үр дүн, лицензийн асуудал болон АМНАТ-тай холбоотой шийдвэрүүдэд эргэлзэж буйгаа мэдэгдлээ. Мөн Аж үйлдвэр,эрдэс баялгийн сайд Г.Дамдинням тайлбар өгсөн. Мэдээллээс тоймлон хүргэе. 

УИХ-ын гишүүн Н.Алтанхуяг: Г.Дамдинням сайдад ашиг сонирхлын асар их зөрчил байна

  -2013 онд намайг Ерөнхий сайд байхад Оюу толгой “Онтрэ”-гийн хайгуулалтын лицензийн ашиглалтын лиценз болгох үйл явц хууль зөрчсөн гэдэг асуудлыг мэдээлж байсан. Тухайн үед энэ лицензийг түдгэлзүүлсэн байсан. Миний харж байгаагаар “Онтрэ”-гийн лиценз одоо байхгүйгээр Монгол Улсын лиценз болсон байх байсан. "Рио-" Тинто"-той манай улс хэлэлцээр хийвэл хийнэ. “Онтрэ”-тэй хэлэлцээр хийгээд байх шаардлага байхгүй. Өөрийнхөө баялгийг өөр хүний нэр дээр бичээд тэрэнтэйгээ хэлэлцээр хийгээд байх хэрэг байхгүй. Ер нь ашигт малтмал ашигласны төлбөрийг багасгана гээд Аж үйлдвэр, эрдэс баялгийн сайд Г.Дамдинням сайд гүйгээд байгаа нь сонирхлын асар их зөрчил байна. Сонирхлын зөрчилтэй холбоотой нотлох баримтыг хүмүүс надад ирүүлсэн. Удахгүй тэр баримтыг дэлгэнэ. Надад ирүүлсэн материалыг нягталж үзэхэд Г.Дамдинням сайдын Канад улсад магистраар сурч байхад хичээл орж байсан багш нар нь “Онтрэ”-тэй холбоотой байсан. Би өөрийн цахим хаяг дээрээ тус баримтын линкийг хуваалцана. Дэлхийд зэсийн үнэ дөрөв дахин өсөөд байхад манай улс “Онтрэ”-д зориулж АМНАТ-өө буулгаж байгаа гэж хардаж байна. Оюу толгой дээр алдсан алдаагаа “Онтрэ” дээр давтах гээд байна.

Г.Дамдинням: Ерөнхийлөгчийн сонгуульд санаатай ахмадууд нас намбаа бодох хэрэгтэй

-Менежментийн төлбөрийг бууруулах ажлын хэсгийн ахлагчийн хувьд 2.2 тэрбум ам.долларын хэмнэлт хийж 1.7 тэрбум ам.долларын өгөөжийг эх орондоо авчирсан. Засгийн газар өдөр, шөнөгүй ажилласан. Хоёр ажлын хэсэг нийлээд 30 их наядын зардлыг бууруулж чадсан. "Рио Тинто”-ийн өмнө Засгийн газар үүрэг амлалт аваагүй. "Онтрэ"-оор бэлэг бариагүй. Тусдаа хөрөнгө оруулалтын гэрээгээр явна.  2009 онд хийсэн маш алдагдалтай гэрээнд суурилж Онтрэ-тэй гэрээ хийхгүй. Онтрэ-тэй хэлэлцээр хийвэл парламентаар оруулна. Ирэх жил Ерөнхийлөгчийн сонгууль болно. Ерөнхийлөгчийн сонгуульд санаатай ахмадууд увайгүй, хардаж, гүтгэж байна. Нас намбаа бодох хэрэгтэй. Манай Засгийн газар 80-хан хоногийн дотор хэлэлцээр хийж бодит үр дүн гаргасан. Гэтэл АН-ынхан ард иргэдийн толгойг угааж байна. Н.Алтанхуяг хариуцлагатай байх ёстой. Энэ хэлэлцээрээр манай Засгийн газар ямар нэгэн үүрэг хүлээгээгүй. "Рио Тинто" юу гэж мэдэгдэх нь хамаагүй. Энэ баялгийн эзэн Монгол Улс. Монгол Улс баялгаа хэрхэн эдийн засгийн эргэлтэд оруулах, хэнтэй хамтрах нь Засгийн газрын эрх. "Рио Тинто"-той хийсэн хэлэлцээрийн нэг гол зүйл нь 2026 оноос ногдол ашиг авах. Одоо хоёр талаасаа санхүүгийн тооцооллыг хийж ногдол ашгаа авна. 

Эх сурвалж: "Зууны мэдээ" сонин

2026 ОНЫ ДОЛООДУГААР САРЫН 6. ДАВАА ГАРАГ. № 127 (7869)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn