Сангийн сайд нар чуулж байна
Ази Европын Сангийн сайд нарын 12 дугаар уулзалт “Ази, Европын хөгжлийн төлөөх түншлэл” сэдвийн дор өнөөдөр Төрийн ордонд эхэллээ.
Манай улс ирэх сард АСЕМ-ийн 11 дүгээр дээд түвшний уулзалтыг зохион байгуулна. Дээд түвшний уулзалтын хүрээнд зохион байгуулж буй дагалдах уулзалтын нэг бол Ази Европын Сангийн сайд нарын 12 дугаар уулзалт юм.
Сангийн яамны Төрийн нарийн бичгийн дарга Х.Ганцогт уулзалтыг нээж үг хэлэв. Харин Сангийн сайд Б.Болор уг уулзалтыг, “Монгол Улсад өнөөдөр эдийн засгийн хамтын ажиллагаа нэн чухалд тооцогдож байгаа энэ цаг үед Ази Европын Сангийн сайд нарын 12 дугаар уулзалт болж байна. Бид нэг улсад айлчлал хийлээ гэхэд тухайн улстайгаа яриа хэлэлцээр хийдэг. Гэтэл Монгол Улс хоёр өдрийн дотор 43 гаруй орон, Олон улсын хоёр байгууллагатай тодорхой уулзалтуудыг хийх гэж байгаа нь томоохон ололт юм” хэмээн тодорхойлж байна.
Нээлтийн ажиллагааны дараа Ази Европын Сангийн сайд нарын 12 дугаар уулзалтын хөтөлбөр болон уг уулзалтаас батлан гаргах тунхаглалын төслийн хэлэлцүүлэг болох юм. Тус уулзалт маргааш үргэлжлэх ба голлох яриа хэлэлцээрүүд үдээс хойшхи хуралдааны үеэр өрнөнө.
Өөрөөр хэлбэл, уулзалтын үеэр “Ази болон Европ тивийн макро эдийн засгийн хөгжил, боломж”, “Дэлхийн нийтийн болон бүс нутгийн түвшинд санхүүгийн тогтвортой байдлыг хангах нь”, “Ази болон Европын таатай харилцаа, хамтын ажиллагаа” гэсэн дэд сэдвүүдийн хүрээнд оролцогчид илтгэл тавьж хэлэлцүүлснээр уулзалт өндөрлөнө.
Тус уулзалтаас Ази Европын Сангийн сайд нарын 12 дугаар уулзалтын тунхаглалыг батлан гаргах ба гол зохион байгуулагч Сангийн яамнаас уулзалтын төгсгөлд нэгдсэн мэдээлэл хийх аж.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
