Илжиг модон хударгандаа гэгчээр хэдхэн жилийн өмнө нийслэлчүүд хэдхэн буудал газар явахдаа 1-2 цаг түгжрэхийг юман чинээ тоодоггүй байлаа. Бүр байх ёстой юм шигээр л хүлээн авч, цаг заваа ч зохицуулаад сурчихсан байсан. Энэ нь монголчуудын аливаа зүйлд дасан зохицохдоо сайных байж магад. Харин одоо бол 1-2 цаг түгжрэхийг байж болохгүй байгалийн гамшиг шиг хүлээн авдаг болжээ. Саяхан тохиосон олон улсын хүүхдийн эрхийн өдөр буюу зургадугаар сарын 1-ний өдөр тэртээ 2011 он шиг түгжирч, нийслэлчүүд хуучнаа эргэн дурслаа. Энэ удаад нийслэлчүүд харин дуугүй байсангүй. Болох ёстой зүйл болсон мэтээр хүлээн авсангүй. Баярын өдөр агаар салхинд гарсан иргэд нийслэл рүү орохын тулд бүтэн гурван цаг түгжирч гэнэ.

Харин хотын төвд тоглолт үзэхээр буюу хүүхэд багачуудаа баярлуулахаар төв рүүгээ орж ирсэн иргэд буцаад харих гэж мөн л 2-3 цаг нам түгжрээд уураа барсан юм байх. Учир нь одоог болтол цахим ертөнцөд түгжрэлийн талаар уурлаж, бухимдсан пост оруулсаар байгаад хамаг учир байгаа юм. Ийнхүү түгжрэлийн эрин зууныг эргэн сануулсан үйл явдал тохиох болсон шалтгаан нь өнөөх шүүмжлэл дагуулдаг дугаарын хязгаарлалт үйлчлээгүйгээс болсон хэрэг. Түүнчлэн ирэх долдугаар сарын 15, 16-ны өдрүүдэд манай улсад болох АСЕМ-ын дээд төвшний уулзалттай холбоотойгоор бүтээн байгуулалт, тохижилтын ажил ид өрнөж байгаа.

Тиймээс ч нийслэлд нэлээд олон замыг хааж, засвар шинэчлэлийн ажил хийж буй. Энэ мэт шалтгаанаас болж баярын өдөр авто замууд нам гацаж хуучныг эргэн сануулсан хэрэг. Өөрөөр хэлбэл, нийслэлчүүд нэг л өдөр нам түгжрэхдээ өнөөх шүүмжлээд байдаг замууд амьдралд нь ямар их цаг хугацааг бэлэглэдэг болохыг ухааруулсан гээд хэлчихэд хилсдэхгүй. Үнэхээр Улаанбаатар авто замын бүтээн байгуулалт сайн хийгдсэн байна. Тухайлбал, 40 гаруй жил гар хүрээгүй байсан зуслангийн чиглэлийн замыг өргөтгөн, шинэчилж, өнгөрсөн даваа гарагт бүрэн ашиглалтад хүлээн авлаа. 40 гаруй жил огт засвар хийгээгүй замыг тавих ажил мөн ч их шүүмжлүүлж байж ашиглалтад орсон доо. Өнгөрсөн жил хийсэн зам нь эвдэрчихлээ. Хачин хэврэг зам хийж, улсын мөнгөөр тоглож байна гэх мэтээр шуугиж эхэлсэн.

Учир нь тус замыг хийсэн компанийнхан өнгөрсөн жил нь суурь хучилтаа хийгээд, энэ жил өнгөн хучилтаа хийсэн юм билээ. Энэ талаар тус замын бүтээн байгуулалтыг хийсэн компанийн ерөнхий инженер “Иргэд биднийг эвдэрсэн зам дээр засвар хийгээд байна гэж буруу ойлгоод байх шиг байна. Өнгөрсөн жил бид суурь хучилт буюу том ширхэгтэй асфальтан хучилтаа хийж дуусгаад, нэг жил өнжүүлсэн. Өөрөөр хэлбэл, суурь хучилтаа хийж орхиод шалгасан хэрэг. Ингээд далан суурийнхаа даац, эвдрэл зэргийг шалгаад, одоо өнгөн буюу нарийн хучилтаа хийж байна. Суурин хучилт дээр нөхөөсөө хийгээд, эвдрэлээ засчихаад өнгөн хучилтаа хийхээр дараа нь зам эвдэрдэггүй. Суурин дээрээ шууд өнгөн хучилт хийвэл эвдрэх магадлал маш өндөр байдаг.

Мөн бид өнгөрсөн жил явган зам, гэрэлтүүлэг зэргээ хийчихсэн. Одоо дугуйн зам, өнгөн хучилт, ус зайлуулах шуудууг хийнэ. Суурь хучилт гурван см, өнгөн хучилтыг таван см хийж байгаа. Нийлээд найман см-ийн зузаантай зам гэсэн үг. Та бүхэн харж байгаа бол бид хуучин хучилт дээр таван см-ын брус тавьж байгаад хучилтаа хийж байна. Анх замын ажил дуусаад нээлтээ хийх үед нь Э.Бат-Үүл дарга “Энэ жил суурь хучилт хийгээд, ирэх жил өнгөн хучилт хийнэ” гэж хэлж байсан. Гэтэл хүмүүс үүнийг мартсан юм шиг байна. Бүтэн жил яриад байхад ойлгохгүй байгаа хүмүүстэй би юу ярих билээ дээ” хэмээсэн юм. Энэ мэтээр нийслэлд хийгдэж байгаа замын ажил бүр шүүмжлэл дагуулж байгаа ч бидний өдөр тутмын амьдралд ямар их хэрэг болдог вэ гэдгийг сануулсан нь боллоо. Тэгэхдээ манайхан ч юмыг их амархан мартдаг хүмүүс шүү дээ.