2016 оны УИХ-ын болон НИТХ-ын сонгуулиар ялагдал хүлээсэн АН-ын үйл ажиллагааг шинэчлэх тухай яриа хэлцэл хэдийнэ эхэлжээ. Тодруулбал, өнөөдөр 12.00 цагаас АН-ын байранд шинэчлэлийн түр хорооноос хэвлэлийн хурал зарласан байна.

АН-ын гишүүд дэмжигчид энэ удаагийн ялагдлаа намын дүрмээ шинэчлээгүй, намаа цөөн хэдэн фракцийн дарга нарт ээлжлэн удирдуулж байснаас үүдэлтэй хэмээн дүгнэсэн бөгөөд намын Их хурлаа хийж Үндсэн дүрмээ шинэчлэх, ээлжит сонгуулиар ялагдал хүлээсэн намын удирдлагуудаа өөрчлөх асуудлыг хэлэлцэх ёстой гэж үзжээ.

АН-ын хувьд сүүлийн хэдэн жил Их хурлаа огтхон ч хийгээгүй бөгөөд УИХ-ын болон НИТХ-ын ээлжит сонгуулиар дүрмийн бус намын даргатай, үүрэг гүйцэтгэгч Ерөнхий нарийн бичгийн даргатай оролцсон билээ.