Нийслэл хэмээх их айл биднийг нэг хаяг, нэг зүрх сэтгэлтэй болгодог. Угаасаа нийслэлд төрсөн өссөн, нүүж ирсэн хүн бүхэн л нийслэлийн иргэн. Тэд сайхан хотод амьдрахыг хүсч л энд ирсэн нь мэдээж. Тэгвэл нийслэл өмнө нь ямар байлаа даа. Хүн бүхэн надаар хэлүүлэлтгүй мэдэж байгаа. Гэтэл өнгөрсөн дөрвөн жилд ямар өөрчлөлт оров. Дахиад нэг бодоод үзье. Хамгийн түрүүнд хамаг амьтны үсийг өрвийлгөж, стресстүүлдэг байсан замын түгжрэл. Гэртээ харих гэж 2-3 цаг түгжирч, түүндээ бухимдан стресстэж, түүнийгээ гэр орныхондоо гаргадаг байсан нь бодит үнэн. Тэгвэл дугаарын хязгаарлалт хийж, маш олон жижиг гүүрэн гарц, шинээр зам гаргаснаар өнөөдөр бид таг түгжирч, үхтлээ уурлан бухимдахаа больсон.

 

Энэ нь эрүүл мэндэд ч ашиг тусаа өгсөн гэж хэлж болно. Бүр дугаарын хязгаарлалтыг бид өөрсдөө хүсдэг болсон шүү дээ. Түүнчлэн утаа, хөрсний бохирдлоос салгах эхний алхам буюу Гэр хорооллын дахин төлөвлөлтийг эхлүүлснээр хаа сайгүй өндөр сайхан орон сууцнууд баригдаж, хашаагаа тохилог сууцаар сольсон иргэд эдүгээ тайван сайхан амьдарч байна. Тун удахгүй ийм сайхан орон сууцанд орно гэж баярлаж, хөөрч байсан хүмүүс олон бий. Арай ороогүй байгаа тэдний хүсэл мөрөөдөл талаар болж, өнөөх л гэр хороололдоо мөнхрөх вий дээ. Үүнээс гадна “Сайн хашаа” хэмээх хөтөлбөрийг эхлүүлсэн нь үнэхээр нүдээ олсон ажил байсан гэдгийг гэр хорооллын 180 гаруй мянган өрхийн иргэд хэлж байсан юм. Сантехникийн сайн шийдлийг хашаа руугаа татуулчихаад тохилог хаус хороолол болно, цаашлаад хотхон ч болж болох юм хэмээн ярьж байсан ах хүүгийн хүсэл мөрөөдөл зогсохгүй гэж найдах л үлдлээ. Төрийн үйлчилгээг бид түгжрэлгүй аваад сурчихжээ, аль хэдийнэ. Энэ бол төрийн үйлчилгээг түмэнд ойртуулсан Нийслэлийн үйлчилгээний нэгдсэн төвүүдийг байгуулсантай холбоотой. 

 

Хэдэн сар жилээр хүлээж, ууртай дарга нарыг тойглож, хаанаасаа хаалгач гэгдэн хараал урсгадаг байсан тэр цаг мартагдсан дууль болчихсон байсан юм. Харин одоо хуучин хэвэндээ орж, албан тушаалын наймаагаар орж ирсэн хүмүүсийг царайчлахгүй байгаа. Элэг бөөр авчих шахсан энхэл донхолтой замууд, эр зоригийн уулзварууд, зуслангийн замууд энэ дөрвөн жилд ямар сайхан боллоо доо. Хэлэх юм биш. Үүнийг манай нийслэлчүүд сайн мэдэж байгаа. За тэгээд, тоочоод байвал цаг цаас хүрэлцэхгүй их ажлыг дөрөвхөн жилийн дотор хийж амжуулсан шүү дээ, Үүл дарга.

 

Өмнөх дөрвөн Засаг даргын санаа ч үгүй ажлыг өнгөрсөн дөрөвхөн жилийн дотор амжуулсан, тэр. Харин сая сонгуулийн дүн үнэхээр харамсмаар гарлаа. УИХ-д бол яах вэ гэхсэн.  АН-ын дөрвөн жилийн хэрүүл, дарангуйлал, ихэрхэл бардамнал өөрсдийг нь тонгорсон нь тодорхой. Харин нийслэлчүүд харалган болчихоогүй баймаар. Ажил хийсэн хүнийг ам хэлээ билүүдсэн хүнтэй андуурчихав уу, эсвэл. Өнгөрсөн дөрвөн жил анх удаа хот шиг хотод амьдарч үзсэн болохоор Үүл даргыг унасанд үнэхээр их харамсч байна. Өнөөдөр хүн бүр л харамсч байна.

 

Түүн шиг сэтгэл зүтгэл гаргаж, хийх гэж зүтгэдэг, хийсэн ажил нь нүдэнд харагдаж, гарт баригддаг дарга дахиад олдохгүй гэдэгт мөрийцөхөд ч бэлэн байна. Нийслэлчүүдийн бараг 90 хувь нь Бат-Үүлийг дахин хотын дарга болгох хүсэлтэй байсан гэдэгт эргэлзэхгүй байна. Саяхан Налайх, Багануур хот захирагчаа өөрсдөө л сонгосон. Тэгвэл нийслэлчүүд бид ч гэсэн ирэх дөрвөн жил хэнийг хотын дарга болгохоо өөрсдөө шийдмээр байна. НИТХ-д сонгогдсон 45 хүн нийслэлийн 1.5 сая иргэнийг бүрэн төлөөлж чадахгүй. Тиймээс л “ХОТЫН ДАРГА”-ыг НИТХ биш нийслэлчүүд нь сонгодог болмоор байна. Э.Бат-Үүлийг хотын дарга болгоё.