Завхан аймгийн Идэр сумаас Идэрийн голоор усан аялал хийхээр тавдугаар сарын 24-ний өдөр гарсан Швейцарийн улсын иргэн  сураггүй алга болсон талаар өмнө бид мэдээлж байсан билээ.

Тодруулбал, Швейцарийн улсын иргэн 69 настай Б Завхан аймгийн Идэрийн голоор усан аялал хийхээр ирсэн ч сураггүй алга болсон юм. Түүнийг хамгийн сүүлд Сэлэнгэ мөрөнд аялж явахыг нь зургадугаар сарын 10-ны өдөр нэгэн иргэн харсан гэснээс хойш сураггүй болсон байсан юм.

Тэгвэл долдугаар сарын 2-ны өдөр Хөвсгөл аймгийн Рашаант сумын Сэлэнгэ багийн нутаг “Цацын булан” гэдэг газарт байдаг гүүрнээс 350 км зайд Сэлэнгэ мөрний салаанаас бургасанд тээглэгдэн тогтсон нэгэн цогцос байгааг Цагдаагийн хэсгийн төлөөлөгч илрүүлжээ.

Тэрхүү цогцос нь алга болоод эрэн сурвалжилж байсан Швейцарь иргэний цогцос мөн гэдгийг “Тарган сарлаг” аялал жуулчлалын компанийн захирал нотолсон учир эрлийн ажиллагааг зогсоолоо гэж Онцгой байдлын ерөнхий газраас мэдээллээ.