Тавантолгой дахь Зэвсэгт хүчний 311 дүгээр ангид Зэвсэгт хүчний 355 дугаар ангийн алба хаагчид цэргийн хээрийн бэлтгэл хангаж байх үеэр байлдааны зориулалттай гранат тэсэрч, хоёр хүн амиа алдаж, найман цэрэг шархадсан ноцтой осол гарсан. Энэ тухай мэдээлэл өчигдөр хэвлэл мэдээллээр цацагдаж, Зэвсэгт хүчний жанжин штабаас мэдээлэл өгсөн ч ослын шалтгаан юунаас болсон, нас барсан алба хаагчид хэн байсан талаар тодорхой мэдээлэл байхгүй байсан юм. Тэгвэл өнөөдөр 10.00 цагт Зэвсэгт хүчний жанжин штаб энэ талаар мэдээлэл өглөө.

Тодруулбал, ЗХЖШ-ын орлогч дарга хошууч генерал Ж.Бадамбазар, Цэргийн нэгдсэн эмнэлгийн эмчилгээ эрхэлсэн орлогч дарга, дэд хурандаа Т.Сүхбаатар, н.Дашзэвэг генерал нарын албаны хүмүүс мэдээлэл өгсөн юм. Амиа алдсан хоёр цэргийн тухайд хоёулаа туршлагатай алба хаагчид байжээ. Тодруулбал, ахмад Б.Мөнгөншагай нь З0 настай, эхнэр, хүүхдийн хамт амьдардаг бөгөөд Өмнөд Судан улсад энхийг сахиулж байсан аж. Харин ахлагч Б.Ариунболд 1993 онд төрсөн 24 настай мөн л эхнэр, хүүхдийн хамт амьдардаг байсан аж. Харин шархадсан цэргүүд 22-28 насны залуус байжээ. Тэд бүх талаар бэлтгэгдсэн, туршлагатай хэмээн онцоллоо.

Энэ талаар Ж.Бадамбазар генерал “355 дугаар ангийн Б.Мөнгөншагай, ахлагч Б.Ариунболд нарын ар гэрт зэвсэгт хүчний бие бүрэлдэхүүний өмнөөс эмгэнэл илэрхийлж байна. Ослын шалтгаан одоогоор тодорхой болоогүй. Төв аймгийн Цагдаагийн хэлтэст шалгаж байна. Салбар яам болон Жанжин штабаас ч ажлын хэсэг томилогдсон байгаа” гэв.

Энэхүү хээрийн сургалт, дадлага нь цэргийн байгууллагуудын хувьд тогтмол болдог аж. Өөрөөр хэлбэл, хавар намрын улиралд хоёр удаа цэргийн хээрийн бэлтгэлд гардаг бөгөөд хоёр үе шаттай явагддаг юм байна. Нэгдүгээрх нь харьяа анги дээрээ болдог бол хоёрдугаар үе шат нь хээрийн бэлтгэлд гарч сургалт дадлагад хамрагдах байдлаар зохион байгуулагддаг ажээ.

Амиа алдсан хоёр албан хаагчаас гадна 11 цэрэг шархадсан гэсэн мэдээлэл цахим сайтуудаар гарсан. Тэгвэл албаны хүний өгсөн мэдээллээр бол анх дэлбэрэлт болсон даруйд хээрийн бэлтгэлд гарсан нийт 25 хүнээс биеийн байдлын талаар мэдээлэл авсан аж. Тухайн үед гурван цэрэг чих шуугиж байна, толгой өвдөж байна хэмээн мэдүүлсэн учраас яаралтай үзлэгт хамруулсан учраас 11 цэрэг гэсэн мэдээлэл өгсөн.

Гранатын тэсрэлтэд тодорхой хэмжээгээр өртсөн нь найман цэрэг гэв. Цэргийн төв эмнэлгийн эмчилгээ эрхэлсэн орлогч дарга, дэд хурандаа Сүхбаатар “Биднийг очиход тэсрэлтийн улмаас галын биет буюу гранатын хэсгүүд гарын сарвуу, гуя, шилбэнд нэвчиж орсон тул цэргүүд маш их цус алдсан байсан. Хагалгаанд орсон цэргүүдийн биеийн байдал хэвийн байна. Яаралтай бүх арга хэмжээг авсан. Ар гэрийнхэнтэй нь ч уулзуулсан” гэлээ. Энэхүү гранат нь 50-250 метр зайд байгаа амьд биетийг устгах хүчин чадалтай юм байна.

Мөн Батлан хамгаалах яам Зэвсэгт хүчний штабаас шархадсан албан хаагчдын гэр бүлийхэнтэй холбоо тогтоон ажиллаж байгаа бөгөөд цэргүүдийн ар гэрт тэдний 10 жилийн цалинтай тэнцэх хэмжээний тэтгэлэг олгохоор болжээ. Цэргийн албан хаагчийн тэтгэвэр, тэтгэмжийн тухай хуульд заасны дагуу дээрх тэтгэмжийг өгөхөөс гадна ар гэрт нь хөгжлийн бэрхшээлтэй иргэд байдаг бол мөн хуульд заасны дагуу тэтгэмж өгөхөөр болсон байна.