-АНУ их хэмжээний зэвсэг худалдах тохиролцоонд хүрчээ-

 

Өнгөрсөн нэгдүгээр сарын 20-нд тангаргаа өргөж, АНУ-ын Ерөнхийлөгчийн албан тушаалд томилогдсон үл хөдлөх хөрөнгийн тэрбумтан Доналд Трамп анхны гадаад айлчлалаа Саудын Арабаас эхлүүллээ. 

 

Түүний айлчлал өчигдөр албан ёсоор эхэлсэн бөгөөд Ерөнхийлөгчийн хувийн хэрэглээний “Air Force One” онгоц орон нутгийн цагаар өчигдөр өглөө 09:50 цагийн үед Риядад газарджээ. Д.Трампыг Саудын Арабын хаан Салман Бин Абдул Азиз угтан авч, гар барин мэндчилсэн байна. Түүнийг тэргүүн хатагтай Мелания Трамп, зөвлөхөөр нь ажиллаж буй охин Иванка, хүргэн Жаред Кушнер нар дагалдан яваа гэнэ. АНУ-ын төрийн тэргүүний Ойрхи Дорнодод хийх айлчлал найман өдрийн турш үргэлжлэх аж. 

 

Энэ удаагийн түүхэн айлчлал нь терроризмын эсрэг, ойрхи Дорнодод энх тайвныг тогтоох зэрэг олон улсад тулгамдаж буй асуудлуудыг шийдвэрлэхэд АНУ-ын тэргүүлэх оролцоо, дотоод гадаад болгоомжлолыг арилгах зорилготой хэмээн зарим эх сурвалжид дурьдсан байна. Д.Трамп Рияд хотод газардсаныхаа дараа хааны ордонд уригдан хүлээн авалтад оролцож, хаан, хунтайж нартай тусгайлсан уулзалт хийжээ. 

 

Энэ үеэр Саудын Арабын тал их хэмжээний байлдааны зэвсэг хэрэглэл худалдан авах хүсэлтээ илэрхийлж, улмаар тохиролцоонд хүрсэн байна. Талууд мөн бүх талын стратегийн түншлэлийн талаар хэлэлцэж,  280 тэрбум ам.долларын хэд хэдэн хэлэлцээрт гарын үсэг зуржээ. Цагаан ордны албан ёсны төлөөлөгч Шон Спайсерын мэдэгдсэнээр, батлан хамгаалахын гэрээний дүн 109.7 тэрбум ам.доллар давсан байна. Эдгээр баримт бичгүүдэд Саудын Арабын Ерөнхий сай­дын хоёрдугаар орлогч, Бат­лан хамгаалахын сайд, өв зал­гам­жил­сан ханхүү Мухаммед бен Сальман Аль Сауд мөн АНУ-ын тө­рийн нарийн бичгийн дарга Рекс Тиллерсон нар гарын үсэг зур­жээ. Гэрээг үзэглэснээр Саудын Арабын зэвсэгт хүчний хү­чин чадал сайжрах боломж бүр­­дэж буй аж.

 

 

Тухайлбал, Агаа­рын дов­тол­гоо­ноос хамгаалах систем, “ухаалаг зэвсэглэл”-ийг  боловсронгуй болгох, бусад төрлийн зэвсэглэлийн үйлд­вэр­лэлийг тус улсад нутаг­шуу­лахаар тохиролцсоноос гад­на  АНУ Саудын Арабт 10 жилийн хугацаанд 350 тэрбум ам.долларын зэвсэг нийлүүлэх тухай санамж бичигт гарын үсэг зурсан байна. 

 

Түүнчлэн, тус улсын мэдээллийн технологийн хөгжлийн корпораци “Apple” компанитай эрчим хүч ашигт малтмал олборлолт, агаа­рын тээврийн салбарт хамт­ран ажиллахаар болжээ. Энэ хүрээнд “Saudi Arabian Airlines” компани Америкийн нисэх онгоц үйлдвэрлэгч “Boeing” компаниас нисэх онгоц худалдаж авахаар тусгасан аж. Үүний сацуу “Аль-Ямама” хааны өргөөнд болсон хүлээн авалтын үеэр хаан Салман Д.Трампад тус хаант улсын дээд шагнал болох Аль Сауд улсыг үндэслэгч Абдель Азиза хааны нэрэмжит одонг гардуулсан гэнэ. Энэ мэтээр түүхэнд байгаагүй хэмжээний томоохон гэрээ хэлэлцээрийг Д.Трамп анхны гадаад дахь айлчлалынхаа үеэр амжуулаад байна. Энэ өдрийн талаар Ерөнхийлөгч Д.Трамп тун сэтгэл хангалуун байгаагаа ч илэрхийлээд амжжээ. Тэрбээр хэлэлцээрийн дараа “Гайхалтай өдөр байлаа.

 

Хэдэн зуун сая ам.долларын хөрөнгө оруулалт АНУ руу хийгдэхээр боллоо” гэж ярьжээ. Харин Салман хаан Доналд Трампыг Саудын Арабт газардсаны дараа өөрийн твиттер хуудастаа “Таны айлчлал бидний нягт хамтын ажиллагааг улам эрчимжүүлж, дэлхийн аюулгүй, тогтвортой байдалд нөлөөлөх гарцаагүй биз ээ” хэмээн байр сууриа илэрхийлсэн байна.