Өнгөрсөн долоо хоногт дэлхий дахинаа өрнөсөн онцлох үйл явдлыг тоймлон хүргэж байна.

В.ПУТИН 15 ДАХЬ УДААГИЙН ШУУД ЯРИЛЦЛАГАА ХИЙВ

ОХУ-ын Ерөнхийлөгч В.Путин жил бүр “В.Путинтай хийх шууд ярилцлага” сэдэвт телевизийн шууд нэвтрүүлэгт оролцож, ард түмнийхээ тавьсан асуултад хариулдаг уламжлалтай. Энэ удаад тэрбээр 15 дахь удаагаа телевизийн эфирээр иргэдтэйгээ нээлттэй ярилцсан нь энэ юм. Шууд ярилцлага өнгөрөгч баасан гарагт болсон бөгөөд энэ үеэр Ерөнхийлөгч В.Путин улс орны эдийн засгийн байдал нь Оросын иргэдийн аж амьдралд хэрхэн нөлөөлж байгаа, хямралыг хэрхэн даван туулах, АНУ болон Европын орнуудын тус улсын эсрэг авсан хориг арга хэмжээ, хөдөө аж ахуй хийгээд хувийн амьдралынхаа талаар ч сонирхсон асуултад хариулт өгсөн байна.

Асуултын тухайд иргэд өнгөрсөн долоо хоногоос эхлэн өгч эхэлжээ. ОХУ-ын Ерөнхийлөгчийн хэвлэлийн төлөөлөгчийн мэдэгдсэнээр иргэд ихэвчлэн нийгмийн халамж, улсын эдийн засгийн нөхцөл байдалтай холбоотой сэдвээр асуултаа ирүүлсэн аж. Харин эдийн засаг болоод хямралыг гэтлэх талаарх асуултад хариулахдаа хамгийн сүүлийн үеийн тоон мэдээллүүдийг танилцуулсан байна. Тодруулбал, Оросын  ДНБ гурван улирал дараалан өсчээ.

Энэ оны эхний дөрвөн сарын байдлаар, эдийн засгийн өсөлт 0.7 хувьтай гарсан байна. Үүний сацуу Төв банкны алт, валютын нөөц болон гадаадад байршуулсан нөөц нэмэгдсэн үзүүлэлттэй гарчээ.  Өнгөрсөн онд нөөцийн нийтийн хэмжээ 368 тэрбум ам.доллар байсан бол 2016 оны сүүлчээр 378 тэрбум ам.доллар, энэ онд 405 тэрбум ам.доллар болж өссөн гэдгийг төрийн тэргүүн дурьдлаа.

Харин Оросын эсрэг авсан хориг арга хэмжээний талаарх асуултад тэрбээр “Орос орон хөл дээрээ зогсч эхэлсэн тэр цагаас хойш бид эдийн засгийн хоригийн нөхцөлд амьдарч байна. Крым ч юм уу эсвэл өөр асуудал байгаагүй тохиолдолд ч гэсэн Оросыг хазаарлан барихын тулд тэд ямар нэгэн өөр зүйлийг  бодож олох л байсан” гэжээ.

Хориг арга хэмжээ Орос улсад нөлөөлсөн, гэхдээ ноцтойгоор нөлөөлөөгүй гэж В.Путин үзэж байна. Энэ хориг бол хоёр үзүүртэй илд бөгөөд хориг тавьсан талд ч мөн адил хохирол учруулсан гэдгийг тэрбээр дурьдлаа. Хөдөө аж ахуйн салбарын өрсөлдөх чадварын тухайд  үр тарианы экспорт, тэр дундаа улаан буудайн экспортоор ОХУ дэлхийд тэргүүлэх болсон гэдгийг В.Путин дурьдаад, тус улс шувууны махны хэрэгцээгээ дотоодын үйлдвэрлэлээр бүрэн хангадаг болсныг сайшаан тэмдэглэжээ. Түүнчлэн, тэр бүл олон нийтэд дэлгээд байдаггүй хувийн амьдрал, охидынхоо тухай ч ярьсан байна.

Шууд ярилцлагын үеэр хоёр дахь зээ нь төрөөд удаагүй байгаа талаар ярьсан нь хэвлэл мэдээллийн анхаарлыг татсан юм. Түүний хувьд гэр бүлийнхээ дотоод асуудлыг тэр бүр нээлттэй яриад байдаггүй билээ. В.Путин хоёр охинтой. Том охин Мария нь 32 настай бол удаах нь 30 настай юм. Тэдний талаар ярихдаа ОХУ-ын төрийн тэргүүн “Тэдний талаар янз бүрийн л яриа гардаг. Охид минь ОХУ-д Москвадаа амьдарч байгаа” гэжээ. Мөн том зээ нь цэцэрлэгт орсон бол хоёр дахь зээ нь төрөөд удаагүй аж. Түүнчлэн, В.Путины  охид  улс төрөөс ангид судалгаа шинжилгээ, боловсролын салбарт ажилладаг гэж ярьсан байна.

ЛОНДОНГИЙН 24 ДАВХАР БАРИЛГАД ГАЛ ГАРЧ, 30 ХҮН НАС БАРЛАА

Их Британийн нийслэл Лондон хотын баруун этгээдэд байрлах 24 давхар өндөр барилгад энэ сарын 14-ний өдөр үнсэн товрого боллоо. 1974 онд ашиглалтад орсон “Грэнфилл тауэр” гэх хотхоны байранд 120 өрх амьдардаг байжээ. Гэвч, мөн өдрийн 01.30 цагийн үед орон сууцанд гал гарч, дөрвөн цагийн дотор гал байшинг бүхэлд нь хамарсны улмаас хэдэн арван хүн, хүүхэд хэн нэгнээс тусламж эрсээр амьдаараа шатаж нас барсан харамсалтай хэрэг гарсан юм. Албаныхны хамгийн сүүлчийн мэдээллээр 30 хүн нас барсан нь тогтоогджээ. Гэхдээ энэ тоо цаашид өсч магадгүй байгаа юм.

Учир нь 58 хүн ор сураггүй болсонд тооцогдож байна. Лондонгийн цагдаагийн газрын Стюарт Кунди “Бид энэ сарын 14-ний шөнө Грэнфилл Тауэрт байсан оршин суугчдын тоог гаргахаар ажиллаж байна. Тиймээс илүү тодорхой мэдээлэл өгөх боломжгүй. Тухайн үед байшинд байсан эсэх нь тодорхойгүй байгаа 58 хүний тухайд харамсалтай нь нас барсан байж болзошгүй” гэж нэмж хэлжээ.

Одоогоор нас барсанд тооцогдож буй 58 хүний 30 нь нас барсан гэдэг нь тодорхой болсон бөгөөд 16-ынх нь цогцос Цогцос хадгалах газарт иржээ.  Түүнчлэн, байшинд амьд хүн байх ямар ч магадлал байхгүй гэдгийг цагдаагийнхан тодотгож байна. Осол гарсны дараа хатан хаан хоёрдугаар Элизабет эмнэлэгт хэвтэн эмчлүүлж буй ард иргэдээ эргэсэн. Тухайн үед тус улсын иргэд Ерөнхий сайд Тереза Мэйг 80 гаруй настай хатан хаан иргэдээ эргэчихээд байхад, нэг ч удаа ослын газарт харагдаагүй хэмээн шүүмжилж байлаа.

Тэгвэл ЕХ-ноос гарах хэлэлцээрийг эхлүүлэх том ажилтай яваа тэрбээр эцэст нь шатсан байшинд очиж аврагчид, ард иргэдтэйгээ уулзжээ. Мөн хохирогчдын ард гэрт тусламж олгохоо энэ үеэр мэдэгдсэн байна.  1974 онд баригдсан уг барилгад өнгөрсөн жил засвар хийн гадна талаас нь дулаалга хийсэн. Дулаалгын материал нь галд амархан авалцдаг материал байсан байх гэсэн таамгийг галын шинжээчид хийгээд байна.

ГЕЛЬМУТ КОЛЬ ТААЛАЛ ТӨГСЛӨӨ

ХБНГУ-ын Засгийн газрыг 16 жилийн туршид /1982-1998он/ тэргүүлсэн “Германы эв нэгдлийн канцлер” Гельмут Коль 87 насандаа өөд болжээ. Ийм цочирдом мэдээг анх “Bild”  таблоид мэдээлсэн бол дараа нь уг мэдээллийг “Германы Христийн ардчилсан холбоо” баталжээ. Хоёр Германыг нэгтгэх үйл явцад голлох үүрэг гүйцэтгэсэн ХБНГУ-ын канцлер асан  энэ сарын 16-ны 09:00 цагийн үед  Рейнланд Пфальц холбооны мужийн Людвигсхафен-ам-Райн хотод гэртээ нас баржээ.

Тэр мөчид түүний дэргэд эхнэр Майке Коль-Рихтер байсан байна. Гельмут Коль сүүлийн жилүүдэд олон нийтийн өмнө гарч ирэх нь туйлын ховор болсон нь эрүүл мэндтэй нь холбоотой байсан бөгөөд тэрээр ярилцлага ч өгөхөө больжээ. 2008 онд Г.Коль агсан толгойндоо гэмтэл авснаас хойш тэргэнцэр дээр суух болсон билээ.  “Гарамгай төрийн зүтгэлтэн”, “Германы суут хүү” гэж Г.Колийг бүх дэлхийн улстөрчид, олон нийтийн зүтгэлтнүүд үнэлж байгаа нь түүхийн хуудсанд баттай байр суурийг эзэлсэн улстөрч гэдгийг харуулж байгаа юм. 

Г.Коль 1930 оны дөрөвдүгээр сарын 3-нд Людвигсхафен хотод банкны ажилтны гэр бүлд төржээ. Тэрээр бага залуу наснаасаа эхлэн улс төрийг сонирхох болсон бөгөөд 16 насандаа Германы Христийн ардчилсан холбооны гишүүн болж, улмаар тус намын залуучуудын байгууллагыг үүсгэн байгуулагчдын нэг болжээ. 1959 онд тус намаас Рейнланд-Пфальцын газрын парламент /ландтаг/-ын депутатаар сонгожээ.

Үүнээс хойш түүний улс төрийн карьер эхэлсэн ба 1966 онд Г.Коль тус намын газрын байгууллагын дарга болсноор намынхаа холбооны удирдах зөвлөлийн гишүүн болжээ. Гурван жилийн дараа тэрээр Рэйнланд-Пфальцын ерөнхий сайд болсон бол 1973 оны зургадугаар сард Германы Христийн ардчилсан холбооны даргаар сонгогдож түүний үнэлж баршгүй тэргүүн манлайлагч нь болсон юм. 1982 онд Социаль-либерал эвсэл задран унасны дараа аравдугаар сарын 1-нд түүнийг ХБНГУ-ын Засгийн газрын тэргүүнээр томилсон юм. Тэрээр канцлерын албан тушаалд 16 жил ажилласан нь урьд хожид байгаагүй удаан хугацаанд ажилласан төрийн тэргүүн болж байгаа юм.  1990 онд Дэлхийн II дайнд ялсан улс гүрнүүдтэй “хоёр дээр нэмэх нь дөрөв” томьёоллоор амжилттай хэлэлцээ хийсний дүнд хоёр Германыг нэгдэх бололцоог бүрдүүлжээ.