Б.Даваа

Францын Ерөнхийлөгчийн сонгуульд хэний ч мэдэхгүй намын нэр дэвшигч ялалт байгуулсан билээ. Байгуулагдаад ердөө нэг жил болж буй шинэхэн улс төрийн хүчнээс нэр дэвшсэн Эммануэль Макрон зөв менежмент ашиглан сонгуулийн сурталчилгаагаа явуулж, үр дүнд нь Францын Ерөнхийлөгч болсон. Ийнхүү Францын улс төрд “шинэ од” мэндэлсэн юм. Тэгвэл түүний ялалтын буухиа үргэлжилсээр байна.

Энэ сарын 11-нд тус улсын парламентын доод танхимын эхний шатны санал хураалт болж, Макроны төвийн үзэл баримтлалт ““La Republique En Marche”  нам болон түүний холбоотон болох  төвийн үзэл баримтлалт улс төрийн хүчин “MoDem” нийтдээ 32.32 хувийн дэмжлэг авч, олонх болох нь нэгэнт тодорхой болсон удаатай.

Харин Францын эрх баригч хүчин болох Социалистууд энэ сонгуулиар 200 суудлаа алдахаар байсан юм. Тэгвэл парламентын доод танхимын шийдвэрлэх шатны сонгууль өнгөрөгч амралтын өдрүүдэд болж, Э.Макроны шинэхэн нам олонх боллоо. Францын парламентын доод танхим болох Үндэсний ассамблей 577 суудалтай, Үндэсний ассамблейн сонгуулийг хоёр үе шаттайгаар явуулдаг. Өнгөрсөн 12-ны өдөр болсон эхний шатны сонгуульд Макроны нам мөн л ялалт байгуулсан юм.

Хоёр дахь шатны сонгуульд эхний шатаар 50 хувийн санал авч чадаагүй сонгуулийн тойрогт санал хураалт болсон. Хоёр дахь шатанд орохын тулд, эхний шатанд дор хаяж 12.5 хувийн санад авах ёстой байдаг. Санал хураалт орон нутгийн цагаар өглөөний 08:00 цагт эхэлж, орой 18:00 цагт хааж, санал тоолох ажил эхэлсэн. Энэ удаагийн сонгуульд 18 сая орчим иргэн саналаа өгснөөс нийт сонгогчдын 48 хувь нь буюу 8.7 сая иргэн Ерөнхийлөгч Макроны намд саналаа өгчээ. Ингэснээр түүний нам нийт үндэсний ассамблейд 350 суудал авсан гэсэн үг юм. Энэ удаагийн сонгуульд анх удаа оролцож ялалт байгуулсан буюу бидний хэлдгээр “бор халзан хонь”-ууд олон байгааг ч хэвлэлүүд онцолж байна.  

Мөн анх удаа 200 гаруй эмэгтэй нэр дэвшигч ялалт байгуулсан нь Францын орчин үеийн түүхэнд  шинэ амжилт боллоо. Шинээр бүрэлдэх үндэсний ассамблейд харьцангуй залуу, бас янз бүрийн арьсны өнгө бүхий нэр дэвшигчид сонгогдсоноос гадна эмэгтэйчүүдийн тоо дээр дурьдсан хэмжээнд хүртлээ нэмэгдсэн нь 1958 оны тав дахь Бүгд найрамдах Засаглал, тэр ч байтугай 1945 оны Францын ардчилалыг бэхжүүлсэн үетэй харьцуулахад томоохон эргэлж болж байна.

Макроны намын гол өрсөлдөгчид болох Францын хэт барууны үзэл баримтлагч Марин Ле Пены нам 135 суудал авсан бол  социалист нам 45 суудал авчээ. Сонгуулийн дүн сүүлийн 10 жилийн турш эрх барьсан намуудад томоохон цохилт болсныг олон улсын хэвлэлүүд онцолж байна.