Украин, ОХУ, АНУ, Европын орнуудын интернэт сүлжээ кибер халдлагад өртөж, компани , банк санхүүгийн байгууллага, дэд бүтцийн байгууламж зэрэг аж ахуй нэгжийн сүлжээ гэмтсэн байна. Вирүс ашиглан дэлхий дахинаа томоохон кибер халдлага үйлдсэн тохиолдол өнгөрөгч тавдугаар сард мөн гарч байсан юм.

Хакерууд вирүс ашиглан компьютерыг түгжин, түүн дэх мэдээллийг авах боломжгүй болгосон байна. Улмаар барьцааны мөнгө нэхэж, түүнийг нь төлөхөөс нааш компьютер дэх мэдээллээ авах боломжгүй болгожээ.

Энэ удаагийн кибер халдлагад ОХУ, Украин, баруун Европын орнууд, Хойд Америк өртсөн байна. Украины төв банк, нийслэл Киев хотын гол нисэх онгоцны буудлууд болон Чернобил, АНУ-ын Мерск, ОХУ-ын төрийн мэдлийн Роснефт, Их Британийн WPP, Францын “Saint-Gobain” зэрэг компаниуд кибер халдлагад өртөөд байна.

Үүнтэй холбоотойгоор Украины Ерөнхий сайд Володымыр Гройсман өөрийн фэйсбүүк хуудастаа өмнө нь ийм төрлийн халдлагад өртөж байгаагүй гэдгээ мэдэгдсэний зэрэгцээ гол сүлжээ халдлагад өртөөгүй гэдгийг онцолсон аж.

Өмнө нь тавдугаар сард вирүс ашигласан томоохон хэмжээний кибер халдлага болж байсан бөгөөд тухайн үед 150 гаруй орны 200 мянга гаруй хэрэглэгч хохирсон “WannaCry” вирүстэй ижил аж.