Олон улсын жүдо бөхийн холбооноос зохион байгуулж буй Бакугийн Их Дуулга тэмцээн арваннэгдүгээр сарын 5-7 хооронд болно. Тус тэмцээнд таван тивийн нийт 29 орны 196 тамирчин оролцох бол манай улсаас 22 тамирчин өрсөлдөх аж.

Өнөөдөр эрэгтэй -73, -81, эмэгтэй -63, -70 кг жингийн барилдаанууд боллоо.

Эрэгтэй -73 кг жинд манайхаас хоёр бөх барилдана. Олимпын хүрэл медальт Ц.Цогтбаатар А хэсгийг тэргүүлсэн бөгөөд эхний тойрогтоо хийлж, хоёрдугаар тойрогт Япон болон Азербайжаны бөхчүүдийн ялсантай нь хүч үзнэ. Харин D хэсэгт орсон О.Уранбаяр эхний тойрогтоо Японы бөх Кен Ойошитэй барилдана.

Эрэгтэй -81 кг жинд манайхаас хоёр бөх барилдана. В хэсэгт орсон Б.Мөррэнцэн эхний тойрогтоо Азербайжаны бөх Карим Маммадовтой барилдана. Харин D хэсэгт багтсан Г.Болор-Очир эхний тойрогтоо хийлж, хоёрдугаар тойрогт Канад болон Бразилийн бөхчүүдийн ялсантай нь барилдана.

Эмэгтэй -63 кг жинд манайхаас хоёр бөх барилдана. А хэсэгт С.Лхагвадулам эхний тойрогтоо Японы бөх Мегуми Хорикаватай барилдана. Харин В хэсгийг тэргүүлсэн Б.Ганхайч эхний тойрогтоо хийлж, хэсгийн аваргын төлөө тойрогт Чехийн бөх Рената Зачоватай барилдана.

Эмэгтэй -70 кг жинд Ц.Энхчимэг В хэсгийг тэргүүлсэн бөгөөд эхний тойрогтоо хийлж, хэсгийн аваргын төлөө Германы бөх Жюли Хойлтерхофтой барилдана.