Канадын CTV News телевизийн мэдээллийн хөтөлбөрөөр монгол эмэгтэй өөрт нь байнга гар хүрдэг нөхрөөсөө охиныхоо хамт  зугтаж,  Канад улсын Калгари хотод хоёр жил амьдарсны эцэст эх нутаг руугаа албадан буцаагдаж байгаа тухай гарчээ.

Монгол Улсын иргэн “А”-ийн нөхөр нь эхнэр,  охин хоёртоо байнга гар хүрч, хүчирхийлдэг байсан нь эх нутгаасаа дүрвэх шалтгаан болсон гэнэ.  Нөхрөөсөө зугтаж, очих газаргүй болсон “А” Канад руу дүрвэж, цагаачлал хүссэн ч түүнд хүчирхийлэлд өртсөн гэх хангалттай нотолгоо баримт байхгүйгээс хоёр жилийн дараа ийнхүү Монгол Улс руу албадан буцаахаар болсон байна.

Иргэн А “Хоосон мэдрэмж төрж байна. Гэхдээ хоёр жил, хоёр сарын хугацаанд охинтой минь хамт байлгасан Канад улсад маш их баярлаж байна. Бид энд байх хугацаандаа тайван сайхан амьдарсан” хэмээн нисэх онгоцны буудал дээр байхдаа CTV телевизэд ярилцлага өгчээ.

Түүний охин Э “Би онгоцны буудал дээр зогсож байх тухай бодохгүй байхыг хичээж байлаа. Гэхдээ би нэгэнт одоо энд ингээд зогсож байна” гэж ярьсан байна. Тэд тун удахгүй нутагтаа ирэх гэнэ.