Бидний мэддэг & мэддэггүй Чиндао хот
М.Даваа
Аялал жуулчлал тэр дундаа далайн эргийн аялал жуулчлалыг жинхэнэ утгаар нь хөгжүүлж, түүнчлэн өөрсдийн давуу тал болох үйлдвэржилтийг дэлхийн түвшинд хүргэж буй Шаньдун мужийн Чиндао хотыг бид тэр бүр сайн мэдэхгүй. Шаньдун хойгийн өмнөд хэсэгт оршдог, Хятадын умард нутгийн сэтгэл татам, үзэсгэлэнт сайхан байгальтай далайн эргийн хот юм. Чиндао бол Хятадын хүчирхэг хөгжлийг харуулсан, стратегийн чухал ач холбогдолтой хотуудын нэг. Бидний мэддэг Haier, Hisense, Tsingtao шар айраг зэрэг дэлхийд алдартай үйлдвэрүүд тэнд байдаг.
Энэхүү далайн эргийн хот сүүлийн жилүүдэд асар хурдацтай хөгжиж байгаа ба гол аж үйлдвэр нь худалдаа арилжаа, хөнгөн үйлдвэр, эмийн үйлдвэрлэл, аялал жуучлал, далай, далайн гаралтай бүтээгдэхүүний үйлдвэрлэл зэрэг юм байна. Нөгөөтэйгүүр Чиндао хот Европ хийцийн барилга, далайн эргийн үзэсгэлэнт сайхан байгалиараа өндөр хөгжилтэй бусад хотуудаасаа онцлогтой аж. Энэ хот байгаль орчноо хамгаалах, агаарын бохирдлын эсрэг тэмцэлд ихээхэн ач холбогдол өгч, өнөөдрийн байдлаар агаарын бохирдолтой хоногийн тоо 70 гаруй хувиар буурсан гэдгийг албаныхан хэлсэн юм.
Түүнчлэн хамгийн олон хүн цугладаг далайн эргийн амралтууд энэ хотод байдаг тул өвлийн улиралд ч энд олон мянган хүн ирдэг гэнэ. Чиндао усан боомт бол Шаньдун мужийн эдийн засгийн гол түшиц төдийгүй Дэлхийн 10 том боомтын нэлээд дээгүүрт бичигддэг юм байна. Тэр утгаараа 180 гаруй орны 700 гаруй боомттой худалдааны чиглэлээр хамтран ажилладаг гэнэ. Зөвхөн энэ тоо л бидэнд энэ хотын чанар чансааг шууд хэлээд өгч байгаа юм. Байгаль орчин, түүх соёлын дурсгалт газрууд, бас орчин үеийн техник технологийг нэвтрүүлсэн энэ муж, энэ хот хүнээ төв болгож, хөгжлөө хурдасгаж чаджээ. Эндээс сүүлийн үеийн техник технологийг нэвтрүүлсэн салбар салбарын үйлдвэрлэл, бүрэн автаматжсан том боомт, татваргүй бүс гээд олон зүйлийг харж болно. Тэр хэрээрээ дэлхий нийтийн анхаарлыг татаж, давуу байдлаа орлого болгож, өнгө төрхөө шинэчлэн орчин үеийн том хот болсон нь гайхах зүйл биш аж. Энэ байдал тэнгэрээс унаж ирээгүй, гагцхүү тэр хотын иргэдийн бүтээлч хөдөлмөрөөс бий болжээ, цаашдаа ч өргөжин тэлэх нь сар жилээр бус өдөр хоногоор хэмжигдэж байна гэдгийг нүдээр үзэж, чихээр сонссон хүний хувьд хэлэх хэрэгтэй биз ээ.
Haier-ийн төрсөн нутаг бол Чиндао
-Анх 1920 онд БНХАУ-ын Чиндао хотод хөргөгчний үйлдвэр байгуулснаар Haier компани бий болжээ. Германы Liebherr компанийн үйлдвэрийн тоног төхөөрөмжийг худалдан авч, чанарын өндөр түвшинд үйлдвэрлэлээ явуулж эхэлснээр өдгөө Haier корпораци гэр ахуйн цахилгаан барааны үйлдвэрлэлээр 2009 оноос эхлэн дэлхийд эхний байрт орж байгаа төдийгүй дотоодын зах зээлдээ хамгийн үнэ цэнэтэй брэнд бүтээгдэхүүн үйлдвэрлэгч болж чаджээ.
Үйлдвэрийн музейг үзээд музей гэж ийм л байдаг байх гэсэн сэтгэгдэл төрснийг нуугаад яах вэ. Эндээс Haier-ийн бүхий л хөгжил, шинэ техник технологийн дэвшлийг харж болно. Нүд эрээлжилж, толгой эргэм гял цал бүтээгдэхүүн. Бид харин ямрыг нь хэрэглээд байгаан бүү мэд, ямартаа ч тэнд олж харсангүй, гэхдээ хараагүй орхигдуулсныг үгүйсгэхгүй.
Ямар нэгэн зүйлээ тууштай, орхигдуулахгүй хийж чадвал, юу ч байсан дэлхийн түвшинд хүрч болдог гэдгийг энэ үйлдвэр, энэ компаниас харж болох аж. Түүнчлэн 2022 онд Чиндао Haier угаалгын хэрэгсэл ХХК нь орлого таван тэрбум 280 саяд хүрч, улсдаа 131 сая юанийн татвар оруулж, 1381 хүнийг ажлын байртай болгожээ.
Бидний мэддэг Цинтао шар айраг
Цинтао энэ бол хятад шар айрагны хамгийн эртний бөгөөд хамгийн алдартай нь гэхэд маргах нэгэн үгүй байх. 1903 оноос хойш Чиндао хотод үйлдвэрлэж эхэлжээ. Чиндао хотод ирсэн хүн бүр энд Цинтао шар айраг хүртэж, бас тус үйлдвэрийн музейг үздэг нь бидний ярьдгаар бичигдээгүй хууль мэт. Эх нутагт нь ирсэн хүн мэддэг, уух дуртай шар айрагныхаа үүх түүх, соёл, уламжлал, хэрэглээ гээд мэдэхийг хүсэх нь дамжиггүй шүү дээ.
Цинтао шар айрагны үйлдвэр 120 жилийн түүхтэй бөгөөд Германы колончлолоос үүдэлтэй гэнэ. Гэвч тэд 100 гаруй жилийн түүхтэй үйлдвэрийнхээ хуучин барилгыг нураалгүй, музей болгон шинэчлэн засварлаж дэлхийд гайхагдсан музей болгон хөгжүүлжээ. Германчуудад анх зориулж хийсэн энэ пивоны үйлдвэр хожим япончуудын мэдэлд шилжиж байсан ч амт чанар өнгө зүсээ алдаагүй өнөөдрийг хүрчээ.
Германчууд 1903 онд шар айрагны энэ үйлдвэрийг тухайн үеийн хоёр сая юаниар байгуулж байсан бөгөөд 1945 онд Хятад улс өөрийн болгожээ. Үйлдвэрийн тухайд автомат ажиллагаатай төдийгүй нэг секунтэд 16 ширхэг пиво савладаг гэх. Бидэнд дэлхийд танигдсан амтыг үйлдвэрээс нь шууд амсах аз тохиосон юм. Хөхүүрийн айраг гэдэгчлэн үйлдвэрээс шууд гарч буй шар айраг гашуун бус уруул чимчигнэсэн нэг л өвөрмөц, өөр амтыг мэдрүүлж байсан юм. Экспортод гаргахад хадгалалт, хамгаалалт гээд нарийн юм байдаг л байлгүй, бид түүнийг нь л ууж байснаас шинэхнийг нь ууж байсан биш. Өнөөдөр дэлхийд нэртэй брэнд болж чадсан нь энэ үйлдвэрийн хөгжлийг илтгэх байх. Далайн эргийн дагуу Цинтао шар айрагны мухлаг, худалдаа үйлчилгээ, бэлэг дурсгал гээд холбоотой зүйл их, түүнтэй зэрэгцээд хүний хөл хөдөлгөөн ч битүү байдаг юм байна.
Эх сурвалж: Монголын мэдээ сонин
2023 оны аравдугаар сарын 05. Пүрэв. №155 (5883)
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
