БНХАУ-ын Харбин хотод Азийн өвлийн спортын IX наадмын нээлт энэ сарын  сарын 7-нд боллоо.

Энэ сарын 14-ныг хүртэл үргэлжлэх тус наадамд 34 орны 1275 тамирчин 11 спортын 64 төрөлд өрсөлдөж буй юм. Тус улс Азийн өвлийн спортын наадмыг гурав дахь удаагаа хүлээн авч буй бөгөөд манай улсын баг тамирчид энэхүү наадамд есөнтөө оролцохоор нээлтийн ёслолд жагслаа.

Азийн олимпын зөвлөлийн ивээл дор зохион байгуулдаг тивийн өвлийн спортын наадам анх 1986 онд Японы Саппоро хотод болсон бол үүнээс хойш Японд дөрөв, БНСУ-д нэг, Казахстанд нэг удаа хүлээн авсан бол БНХАУ-д гурав дахь удаагаа энэхүү наадмыг зохион байгуулж байна.

Монгол Улсаас энэ удаагийн наадамд дөрвөн спортын долоон төрөлд 28 дасгалжуулагчийн удирдлага дор 35 тамирчин оролцож байгаа нь түүхэндээ хамгийн олон бүрэлдэхүүн болов.

Монголын баг тамирчид “Саппоро-1990” Азийн өвлийн спортын наадмаас эрэгтэйчүүдийн гүйлтийн цанын буухиа төрлөөр анхны хүрэл медалийг хүртэж байсан бол дараа нь “Чанчүн-2007” наадамд уулын цанын чөлөөт гулгалтаар хүрэл медаль, “Астана, Алматы-2011” наадмаас бөмбөгтэй хоккейн баг мөнгө, цанын зүг чиг олох уралдаан (ski orienteering)-ы төрлөөр дөрвөн хүрэл медаль хүртсэн.

Монголын баг тамирчид Азийн өвлийн спортын наадмаас нэг мөнгө, зургаан хүрэл буюу нийт долоон медаль хүртжээ.