Монгол банкны захиалгаар Үл хөдлөх хөрөнгийн “Тэнхлэг зууч” компанийн хараат бусаар хийсэн “Орон сууцны үнийн индекс”-ийн судалгааны аравдугаар сарын үр дүнг өнөөдөр танилцууллаа. Танилцуулгыг “Тэнхлэг зууч” компанийн гүйцэтгэх захирал Д.Должинсүрэн хийсэн юм. ОСҮИ-ийг Хедоник регрессийн аргаар тооцоолсон бөгөөд энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин нийт 4891 орон сууцны мэдээллийг хамруулжээ.

Судалгаагаар өнгөрсөн аравдугаар сард Орон сууцны үнийн ерөнхий индекс 1.1 хувьтай гарсан байна. Энэ нь өмнөх сараас 0.16 хувиар буурсан үр дүн аж. Ерөнхий индексийг эхэн үетэй харьцуулахад 4.1, өнгөрсөн оны мөн үеийнхтэй харьцуулахад 5.6 хувиар буурсан байна. Харин үнийн индексийн үзүүлэлтийг шинэ, хуучин орон сууцаар ангилж үзвэл шинийнх нь 14.4 хувьтай гарсан аж. Энэ нь өмнөх сараас төдийлөн өөрчлөгдсөнгүй. Харин оны эхэн үетэй харьцуулахад, 3.9 хувь, өнгөрсөн оны мөн үетэй харьцуулбал 3.7 хувиар буурсан байгаа юм байна.

Тэгвэл хуучин орон сууцны үнийн индекс -7.3 хувьтай гарсан байна. Энэ нь өмнөх сараас 0.3 хувиар буурсан бол оны эхэн үетэй харьцуулахад 5.9, өнгөрсөн оны мөн үеийнхээс 8.5 хувиар буурчээ.