Монгол Улсын Засгийн газраас агаарын бохирдлыг бууруулах ажлын хүрээнд нийслэлийн гэр хорооллын айл өрхийн ахуйн болон халаалтын зориулалтаар хүйтний улиралд орой, шөнийн цагт хэрэглэсэн цахилгааны тарифыг 100 хувь хөнгөлсөн билээ. Шөнийн тарифыг оройн 21.00 цагаас өглөөний 06:00  цаг хүртэл тэглэх бөгөөд энэ оны нэгдүгээр сарын 1-ний өдрөөс ирэх дөрөвдүгээр сарын 1 хүртэлх хугацаанд үргэлжлэх юм. Энэ талаар өнөөдөр Эрчим хүчний зохицуулах хорооны дарга А.Тлейхан, Үнэ тарифын хэлтсийн дарга Б.Болор-Эрдэнэ, Эрчим хүчний зохицуулах хорооны зохицуулагч Д.Бассайхан нарын албаны хүмүүс өнөөдөр мэдээлэл өглөө. 

Нийслэлийн гэр хороололд нийтдээ 146 мянган өрх цахилгаан хэрэглэдэг байна. Улмаар цахилгааны тарифын хөнгөлөлт эдлэхийн тулд тухайн өрх хоёр тарифт тоолуур ашигладаг байх шаардлагатай аж. Харин одоогийн байдлаар тэдгээр өрхийн 110 мянга орчим нь хоёр тарифт тоолууртай бөгөөд үлдсэн айл өрх хөнгөлөлт эдлэхийн тулд заавал хоёр тарифт тоолуур тавих шаардлагатайг албаныхан онцолж байлаа. Стандартын тоолуур нь УБЦТШС болон бусад холбогдох мэргэжлийн байгууллагуудад худалдаалагдаж байгаа юм байна. 

Энэ үеэр ЭХЗХ-ны дарга А.Тлейхан “Хэрэглээний хувьд 380 вольт цахилгаан хэрэглэдэг айлууд 1500 кВт, 220 вольтын цахилгаан хэрэглэдэг айлууд 700 кВт-ын чадлын дээд хязгаар тогтооно.  Учир нь хэрэглэгчдийн хэрэглэж буй цахилгаан дамжуулах утасны нэвтрүүлэх чадалтай холбоотой. Цахилгааны аюул, эрсдэлээс хамгаалсан арга хэмжээ гэж ойлговол зохино. Өмнө нь арваннэгдүгээр сарын 1-нээс эхлэн бүх айл өрх цахилгааны 50 хувийн хөнгөлөлт эдэлдэг байсан бол нийслэл хотын гэр хорооллын өрхүүд нэгдүгээр сарын 1-нээс дөрөвдүгээр сарын 1-ний хооронд 100 хувийн хөнгөлөлт эдлэх боломжтой болж байна.

Ингэснээр нэг талдаа утааны хэмжээ багасна, нөгөө талдаа гэр хороололд амьдарч буй өрхийн зардал тодорхой хэмжээнд буурна гэж үзэж байгаа. Нэг зүйлийг онцлоход, энэ удаа гэр хорооллын өрхийн хэрэглээний цахилгааныг тэглэсэн. Цахилгааны тарифыг тэглэчихлээ гээд янз бүрийн үйлдвэрлэл үйлчилгээ явуулж болохгүй. Үүнээс болоод цахилгааны утасны ачаалал ихэсч аливаа эрсдэл гарч болзошгүйг анхаарах хэрэгтэй” гэлээ.

Дашрамд дуулгахад, өмнө нь иргэдийн шөнийн цахилгааны хэрэглээний тарифыг 50 хувь хөнгөлөлт үзүүлж байх үед 3.4 тэрбум төгрөгийн зардал гарч, үүнийг эрчим хүчний салбар өөрөө хариуцдаг байжээ. Харин гэр хорооллын өрхийн шөнийн тарифыг 100 хувь тэглэснээр 4.8 тэрбум төгрөгийг зардал гарна гэж албаныхан тооцсон байна.  Энэхүү зардлыг БОНХАЖ-ын сайдын багцаас гаргах аж.