Туркийн Истанбул хотын шөнийн клубт энэ сарын 1-нд зэвсэглэсэн этгээд халдлага үйлдэж, 39 хүн амиа алдсан. Гэвч гэмт этгээд хэргийн газраас зугтаж, саяхныг хүртэл эрэн сурвалжлагдаж байсан юм.

Тэгвэл түүнийг өчигдөр Истанбул хотоос баривчилсан байна. Эх сурвалжийн мэдээлж буйгаар халдлага үйлдэгч узбекистан хүн байжээ.  Хэрэг он солигдсоноос ердөө хоёр цагийн дараа Истанбулын төв хэсэгт байрлах өндөр зэрэглэлийн шөнийн клубт гарсан бөгөөд тэнд 500 гаруй хүмүүс шинэ жилийн баяраа тэмдэглэж байсан гэдэг.

Гэвч гэмт этгээд гал нээсний улмаас нийтдээ 39 хүн алагдаж, хэдэн арван хүн гэмтэж бэртсэн. Халдлагыг хэт даврагч “Лалын улс” бүлэглэл үйлдсэн гэдгээ хүлээж,  Сирид явуулж буй Туркийн цэргийн ажиллагааг эсэргүүцэн шөнийн клубт террорист халдлага үйлдсэн гэдгээ мэдэгдсэн удаатай.