Дэлхийн хэмжээнд бага насны хүүхдийн нас баралтын дийлэнх шалтгааныг уушигны хатгалгаа өвчин эзэлдэг байна. Тэгвэл Уганда улсын инженерүүд тус өвчнийг хялбар, аргаар хурдан оношлох боломжтой “Ухаалаг хантааз”-ыг зохион бүтээжээ. Тус бүтээлийг зохион бүтээх санааг 26 настай Оливиа Кобуронго гэх эмэгтэй гаргасан бөгөөд өөрийн амьдралд тохиолдсон харамсалтай явдлаас үүдэн уг төхөөрөмжийг бүтээсэн гэнэ.  Түүний эмээ уушигны хатгалгаа өвчин туссан боловч, зөв оношлогдохгүй байсаар хүндэрч байжээ.

Ингээд Оливиа Кобуронго мэдээлэл технологийн чиглэлээр суралцдаг танилтайгаа уулзаж, улмаар эмч нарын багтай хамтран ажилласны дүнд дижитал технологиор оношилж, гар утсанд мэдээлэл дамжуулах апп бүхий “Mama ope” гэх ухаалаг хантаазыг бүтээжээ. НҮБ-ын Хүүхдийн сангийн мэдээллээр Угандад жилд тав хүртэлх насны 24000 мянган хүүхэд уушигны хатгалгаа өвчнөөр нас бардаг байна.

Гэхдээ тэдний олонхи нь “хумхаа” хэмээн буруу оношлогдсоноор хүндэрдэг ажээ. “Mama ope” төхөөрөмжийг ашиглахад тун хялбар гэнэ. Эмч, сувилагч нар хүүхдэд тус ухаалаг хантаазыг өмсүүлэхэд л хангалттай. Харин хантааз дахь мэдрэгч  биеийн дулаан, амьсгалын тоо зэргийг тооцох бөгөөд гарсан мэдээллийг ухаалаг утасны апп руу илгээхэд тус апп өгөгдлийг харьцуулан оношилдог байна.