Украины зүүн хэсэгт гал зогсоох хэлэлцээрийн заалт мөрдөгдөлгүй нөхцөл байдал дахин хурцдаж эхэлсэн билээ. Тэгвэл өнгөрөгч бямба гарагт сөргөлдөөний бүсэд  салан тусгаарлагчдын армийн машин дэлбэрч, томоохон армийн командлагч амиа алджээ. Түүний сууж явсан машинд тэсрэх бөмбөг суурилуулсан байсан аж. Мөн хэд хэдэн суудлын автомашин ч ээлж дараалан дэлбэрсэн тухай эх сурвалжууд мэдээлж байна.

Салан тусгаарлагчдын мэдэгдэж буйгаар нас барсан командлагч Луганскийн Бүгд найрамдах улсын цэргийн командлагч Олег Анашенко байжээ. Машин Оросын талыг баримтлагч салан тусгаарлагчдын хяналтад буй албан бус нийслэл гэж нэрлэгддэг Луганскийн зүүн хэсэгт дэлбэрсэн байна. Дэлбэрэлтээр Олег Анашенкогоос гадна өөр нэг хүн мөн амиа алджээ. Салан тусгаарлагчдын хувьд Украины цэргийнхэн эл дэлбэрэлтийг зохион байгуулсан хэмээн мэдээлж байгаа. Харин Украины тал үгүйсгэж байгаа юм. Өнгөрсөн жилийн наймдугаар сард ч гэсэн Луганскийн Бүгд найрамдах улсын удирдагч Игорь Плотницки мөн үүнтэй төстэй халдлагын улмаас гэмтэж байсан удаатай.

Украины Засгийн газрын арми болон Оросын талыг баримтлагч салан тусгаарлагчдын хоорондын сөргөлдөөн өнгөрсөн сарын 29-нөөс хойш ширүүсч, эдүгээг хүртэл нийтдээ 35 хүн амиа алдсан нь энэ. Мөн сөргөлдөөн үргэлжилж буй хот тосгодын цахилгаан бүхэлдээ тасарсны улмаас олон иргэд даарч бээрэн өдөр хоногийн хүндхэн өнгөрүүлж буй гэнэ.

Энэ удаагийн тэмцлийг салан тусгаарлагчид эхлүүлжээ. Тэд өнгөрсөн сарын 29-нд Засгийн газрын армийн хяналтад буй Авдийвкаг эзлэн түрэмгийлэх зорилгоор давшиж эхэлсэн байна. Ингээд сөргөлдөгч талуудын хоорондын ширүүн тэмцэл эхэлж, хоёр талын цэргийн алба хаагчид болон энгийн иргэд нийлсэн 35 хүн нас баржээ. Энэ тоо цаашид нэмэгдэж магадгүй болжээ.

Талууд 2016 оны арванхоёрдугаар сарын 23-нд гал зогсоох тухай шинэ хэлэлцээрт тохиролцоонд хүрсэн удаатай.  Гэвч хэлэлцээрийн заалт хэрэгжилгүй сөргөлдөөн эдүгээ ийм хэмжээнд хүртлээ хурцаджээ. Үүссэн нөхцөл байдалтай холбогдуулан  Украины Ерөнхийлөгч Петро Порошенко Германы Берлин хотод айлчлах айлчлалаа цуцалж, Улсын Үндэсний аюулгүй байдлын хороог яаралтай зарлан хуралдуулсан байна.

Энэ үеэр үл хөдлөх хөрөнгийн тэрбумтан Доналд Трамп АНУ-ын Ерөнхийлөгч болж, ОХУ-ын Ерөнхийлөгч В.Путинтай ойр харилцаатай байхаа илэрхийлсэн нь Украины дотоодын сөргөлдөөнийг улам дэвэргэх вий гэдэг санаа зовниж буйгаа илэрхийлсэн юм. Хүн амын ихэнх нь Оросоор ярьдаг Украины зүүн этгээдийн аж үйлдвэрийн бүсэд Киевийн барууныхны бодлогыг эсэргүүцсэн бослого 2014 онд эхэлснээс хойш эдүгээг хүртэл 10 гаруй мянган хүн амиа алдаад байна.