ОХУ-ын НҮБ дэх элч төлөөлөгч 64 настай Виталий Чуркин өчигдөр Нью Йорк хотод байхдаа гэнэт нас баржээ. Энэ талаар тус улсын Гадаад хэргийн яамнаас мэдээлсэн байна. Одоогоор түүний үхлийн шалтгаан тодорхойгүй байгаа аж. Гэхдээ зарим эх сурвалжийн мэдээлснээр Чуркин НҮБ-ын төв байранд ажлаа хийж байхдаа гэнэт ухаан алдаж, Манхаттаны эмнэлэгт хүргэгджээ. Тиймээс албаныхан зүрхний ямар нэг өвчний улмаас нас барсан байж магадгүй хэмээн үзэж буй аж.

Тэрээр өнөөдөр 65 насны төрсөн өдрөө тэмдэглэх байжээ. В.Чуркин 2006 оны дөрөвдүгээр сард тус албан тушаалд томилогдоод 10 гаруй жилийн нүүрийг үзжээ. Энэ хугацаанд ОХУ-ын НҮБ дэх Элч төлөөлөгчийн хувьд АНУ, Европын орнуудын шүүмжлэлийг няцааж, Украин, Сирийн талаар
Оросын Засгийн газрын баримталж буй үйл ажиллагааг хамгаалж ирсэн байдаг.  Тэрээр өмнө нь ОХУ-ын Гадаад хэргийн яаманд ажиллаж байснаас гадна Бельги, Канадад Элчин сайдаар сууж байжээ.