Бразилын Ерөнхийлөгч Мишель Темер таагүй мэдрэмж төрүүлдэг, сүнстэй гэх шалтгаанаар нийслэл Бразилиа  хотод байрлах тансаг харш Алворада ордныг голжээ.  Эдүгээ 76 настай тэрбээр гоо бүсгүйн тэмцээнд тэргүүлж байсан үзэсгэлэнт эхнэр, долоон настай хүүгийнхээ хамтаар тус ордонд амьдардаг байсан боловч,  дээрх шалтгааны улмаас дэд Ерөнхийлөгчийн ордонд нүүн очиж, бразилын улстөрийн хүрээллийнхнийг гайхшруулаад амжсан байна. Өнгөрсөн жилийн есдүгээр сард тус улсын Ерөнхийлөгч Дильма Русефф огцрох хүртэл Темер дэд Ерөнхийлөгчөөр ажиллаж байсан. Харин тушаал дэвшин улсын Ерөнхийлөгчөөр томилогдсон ч, орны хүнээ хараахан томилоогүй байгаа юм. Тиймээс дэд Ерөнхийлөгчийн ордон хоосон байсан хэрэг.

Гэтэл хэдхэн сар Ерөнхийлөгчийн ордонд амьдарсан Мишель Темер сүнс, буг чөтгөртэй гэх шалтгаанаар Алворада ордныг орхиж, хуучин амьдарч байсан дэд Ерөнхийлөгчийн байр руугаа нүүсэн байна.

Уг нь тус улсын Ерөнхийлөгчийн ордон том усан сан, хөл бөмбөгийн талбай, мөргөлийн танхим, эмчилгээний байгууламж, асар том талбай бүхий зүлэгтэй  орчин үеийн загвартай, хэн ч харсан мөрөөдлийн байшин аж. Мөн барилгын загварыг архитектурч Оскар Ньемейер агсан  гаргасан байна. Гэтэл Ерөнхийлөгч Темер түүний 33 настай эхнэр Марсела Темер нар урд талыг нь шилээр хийсэн тус барилгыг сүнстэй, буг чөтгөр шүглэсэн гэж үзэн, ийнхүү дайжжээ. Орон нутгийн хэвлэлд бичсэнээр Темер  “Тэнд ямар нэг сонин мэдрэмж төрдөг. Эхний өдрийн шөнөөс эхлээд л унтаж чадаагүй. Онцгүй энергитэй газар. Марселад ч гэсэн надтай ижил мэдрэмж төрсөн. Бид сүнстэй байх гэж бодож байгаа” гэж ярьжээ. Өдөр тутмын “O Globo” сонинд нийтлэгдсэнээр тэргүүн хатагтай Марсела санваартан хүртэл дуудан ирүүлсэн ч, үр дүн гараагүй гэнэ.