Түвдийн Кардзе дахь нэгэн сүмийн гадна 24 настай түвд залуу өөрийгөө шатаажээ. Түүнийг Пема Гялцэн гэдэг бөгөөд тус мужид БНХАУ-ын бодлогыг эсэргүүцэгчид олноороо оршин суудаг байна.

Залуу Кардзегийн Нярон дахь Цоха сүмийн ойролцоо орон нутгийн цагаар 16.00 цагийн үед эсэргүүцлээ илэрхийлэн, өөрөөрөө тахил өргөн, шатаасан ажээ.

Хэрэг гарах үед цагдаагийнхан мэдээлэл тархахаас сэргийлж, тухайн газрын интернет сүлжээг тасалж, түвд залууг баривчилж явжээ. Зарим гэрчүүд залууг баривчлагдах үедээ амьд байсан гэж мэдээлж байгаа ч, амьд, үхсэн эсэх нь одоогоор тодорхойгүй байгаа гэнэ.

“Эрх чөлөөт Түвд” байгууллагын мэдээлснээр 2009 оноос хойш 140 гаруй түвд хүн өөрийгөө шатаасны ихэнх нь лам, гэлэнмаа нар байжээ. Тэд Түвдийн ёс заншил, шашны хэрэгт хятадууд хөндлөнгөөс оролцож байгааг эсэргүүцэж өөрсдийгөө шатаадаг бөгөөд тэдний ихэнх нь нас барсан байна.