Монгол Улсын Ерөнхийлөгчийн ээлжит сонгууль энэ сарын 26-нд болж, өндөрлөсөн билээ. Сонгуулийн дүн гарахад гурван нэр дэвшигчийн хэн нь ч сонгогчдын 50-иаас дээш хувийн санал авч чадаагүй юм. Тиймээс дахин санал хураалт болохоор болсон билээ.

Дахин санал хураалт АН-аас нэр дэвшигч Х.Баттулга, МАН-аас нэр дэвшигч М.Энхболд нарын хооронд болно. Тэгвэл СЕХ дахин санал хураалтыг ирэх сарын 9-ний өдөр зохион байгуулахаар тов зарласан. Үүнийг АН-ын зүгээс буруутгаж, баяр наадамтай зэрэгцүүлж санал хураалт явуулахыг эсэргүүцэж байгаа юм. Тиймдээ ч АН-ын зүгээс дахин санал хураалтын товыг наашлуулж, ажлын өдөр зохион байгуулах шаардлагыг хүргүүлсэн билээ.

Харин өнөөдөр Монголын Ардчилсан холбооноос СЕХ-нд албан шаардлага хүргүүлж, дахин санал хураалтыг долдугаар сарын 6-нд явуулахыг санууллаа. Тэд шаардлагынхаа хариуг маргааш 11:00 цагт авах хүсэлтэй байгаагаа илэрхийлсэн байна. Хэрвээ шаардлагын хариуг өгөхгүй бол тэмцлийн дараагийн хэлбэрт шилжих ажээ.