“Залуу эмэгтэйчүүдийн дуу хоолой” форум найм дахь жилдээ энэ бямба гарагт “Хүн амаа өсгөх бодлого ба амьдралын чанар” сэдвийн хүрээнд “Бидэнд шийдэл байна” уриатайгаар болох гэж байна. УИХ-ын сонгуульд өрсөлдөж буй улс төрийн намууд хүн амаа өсгөх бодлогод анхаарахаа илэрхийлж, төрөлтийг урамшуулах зорилгоор гэр бүл, хүүхдэд бэлэн мөнгө тараах амлалт өгдөг уламжлалтай. Улмаар сонгуульд ялсан нам Засгийн газрын үйл ажиллагааны хөтөлбөртөө энэхүү  амлалт, бодлогоо тусгасаар ирсэн билээ.

Тэгвэл форумд оролцогч залуу эмэгтэйчүүд Монгол Улсад хэрэгжиж буй “Хүн амаа өсгөх бодлого” нь амьдралын чанарт хэрхэн нөлөөлж буй талаар тодорхой тохиолдол, бодлого, хууль тогтоомжийн хүрээнд дүн шинжилгээ хийж, бодлого гаргагчдад санал, зөвлөмж бүхий байр суурийн баримт бичиг хүргүүлэх гэнэ.

Энэ удаагийн форумын нэг онцлог нь 11 аймаг, гурван дүүргийн Залуучууд хөгжлийн төвүүдэд урьдчилсан хэлэлцүүлэг өрнүүлсэн явдал юм. Тодруулбал, орон нутгийн залуу эмэгтэйчүүд өөрсдийн оршин суугаа аймаг, дүүрэг, суманд залуу эмэгтэйчүүдэд тулгамдаж буй асуудлаар хэлэлцүүлэг өрнүүлж, дүгнэлтийг нэгдсэн форум дээр танилцуулан, бодлого гаргагчдад уламжлах зорилготой юм байна. “Залуу эмэгтэйчүүдийн дуу хоолой” форум энэ сарын 08-ны 09:00-17:00 цагийн хооронд Blue Sky Hotel-ийн Tower зочид буудлын Даймонд танхимд болох юм ажээ.